Meurumpok Ngon Putroe
Di Blang teumulek gampong lon asli
Toe bineh pasi nyang leo bak seukee.
Sinan keuh poma dan makam abi
Kalon peugah kri hai bungong kumbee.
Nyoe jampang jampang hanpat neumita
Kadang ceurita roh keuneuk lakee.
Keunan keuh neujak lam ujong desa
Cit lon treon lanja di ateuh juree.
Meunasah mesjid leo ureung jak beut.
Arongan pocut rab gampong balee.
Jinoe lon puwoe keubah hikayat
Meunyan that ajab yoh jameun jilee.
Dituan putroe leugat ka geuba
Cut pari gangga teuma ka seudee.
Sigoe geuintat kadeungon mata
Bak bungong jeumpa meunyan mangat bee.
Cut putroe muda neuwoe le lanja
U dalam kuta nyan bungong seukee.
Ka meugisa keu cut pari gangga
Bak sang bangon ka cit seudee ratee.
Ka gadeoh ingat dipo samlakoe
Hana le putroe meunyang harom bee.
Teuma beudeoh le leugat neujak woe
Bandum sinaroe kadeungon guree.
Oh troh u rumoh ka neukeumbali
Cut ponek siti neutanyong dilee.
Nyoe ka seulamat hai bintang pari
Keu upah pakri peu ka meuteuntee ?
Cut pari gangga hana neuseuot
Muka neuh lucot bit hana lagee.
Hate neuh susah nyan putik rambot
Bak sang kateubot nyawong neuh padee.
Nibak malam nyan cit hana teungeut
Sayang that pocut mata neuh reudee.
Di dalam hate keubit meuheet heut
Hana sakon jeut sinyak harom bee.
Meunan le neukheun cut pari gangga
Hana neukira le keu meunalee.
Wahe e putroe cahaya mata
Tatem peuseunda lon nyoe bit teuntee.
Yoh golom troh lon laen meuhaba
Watee lon teuka ka laen lagee.
Nibak pihak lon cit ureung hina
Meunyan ban rupa kah bungong kumbee.
Tatem tinggai lon di ateuh balee
Cut bungong seukee tajak woe dilee.
Nibak rilaku lon tapeulalee
E meuh meu uree nyang mangat that bee.
Teuduek keuh siat pocut samlakoe
Akan keu putroe lon puwoe dilee.
Oh ban sare troh dalam meuligoe
Ka tahe keudroe nyan bungong kumbee.
Oh jibeuot bu hana geupajoh
Cut puteh lusoh sayang ka reudee.
Watee neuingat hate neuh putoh
Keu bintang tujoh nyang ka meusubee.
Bukon le sayang si aneuk puyoh
Akhe jipiyoh bak cabeung kayee.
Bukon le sayang cut puteh lusoh
Bak sang nyum luroh nyan ok di ulee.
Cut mulu sari neumarit sigra
Wahe meukuta ci neudeungoe kee.
Meubek tuwanku that that meucinta
Cit hana laba wahe pang ulee.
Meunyoe neu hajat nyan keu boh mamplam
Kanibak uram tajak preh dilee.
Meubit kon meunan hai syahi alam
Meunyan boh mamplam pakri meutumee ?
Neujaweub putroe nyang rupa ceudah
Beh peu kapeugah bit tuto asee.
Dikee lam hate kuh get that gundah
Keu masaalah nyoe golom teuntee.
Na dua boh teuk golom seuleusoe.
Meunyan keuh kamoe hate neuh reudee.
Meunyang bit patot cit kaglah baroe
Kamaba jak woe buet kah yoh dilee.
Cit golom teuntee meunyang jeh dua
Meugrit keuh raya kajak puwoe kee.
Meunyan keuh seubab hate lon ruga
Meubek ka sangka nyang laen lagee.
Teulheuh neumarit pocut jroh rupa
Malam pih jula lumpue ka padee.
Putroe ka neu eh lam tiree rawa
Teuma di mata han jitem reudee.
Adak pih neupet teutap cit teubleut
Hanjitem teungeut cut bungong kumbee.
Sayang bit raya nyan raja pocut
Hanjitem teungeut pakri ban lagee.
Bak sang lam hate nyum nibak mata
Cut pari gangga meunyang mangat bee.
Putroe ka ceumong di dalam dada
Hana meuhoe ka cut bungong seukee.
Teungoh neungieng ngieng lazat that mata
Cut sari teuma kaneu peusilee.
Hana ji ingat keu rugoe raya
Lon putoh asa pakri ban lagee.
Meunan neumariet po nyang jroh rupa
Cut mulu nyang ka neupeugot beusee.
Dara that areh ceudah bit han soe
Teuma neupeugoe dendayang dilee.
Kaneu pasoe le dua boh hidang
Nibak dendayang neupeugah lagee.
Tajak le gata jinoe ju rijang
Nibak cut intan meunyang mangat bee.
Ngon takheun saleum bak putroe intan
Cut bungong keumang bak sang kalayee.
Keu masaalah nyang gohlom simpan
Meunyan keuh jalan nyang jeut keu reudee.
Cut kak dendayang neujak le laju
Katroh bak tungku nyan bungong kayee.
Cut gangga pari cit bungong meulu
Meunyan pih tungku ka saboh lagee.
Cit hana teungeut si malam beungoh
Sare neuh meh moh neupeugot bisee.
Bak sang lam baho ji peu ek nanoh
Di eumpieng beungoh sayang bit ratee.
Troh le dendayang keunan jiteuka
Ngon hidang raya ji ateuh ulee.
Neutanyoeng laju teuma le sigra
Meupeu nyang neuba wahe pang ulee ?
Oh na taneuk jak meupeu na haba ?
Wahe e poda peugah beu teuntee.
Cut po dendayang neujaweub sigra
Wahe meukuta nyang batee ulee.
Meu seumbah saleum cit keu tuanku
Bak putroe bungsu meunyang di juree.
Meunyoh ngon dendam hate neurindu
Meuneupajoh bu hana le teuntee.
Rindu lam hate cut putroe indah
Keu masaalah nyang gohlom teuntee.
Na dua boh teuk meunyang hana glah
Meunyan keuh susah cut bungong kumbee.
Cit hana teungeut simalam beungoh
Putroe ka meh moh wahe pangulee.
Kamoe nyoe bandum ka habeh geupoh
Le cut putroe jroh bak sang ka ratee.
Janji di lee phon suai lapan boh
Teuma dua boh seunaleung ulee.
Meunan di pocut suai neutamah
Beusampoe ek glah beu ban nyang jilee.
Seurta ngon panton cut po dendayang
Ka deungon hidang di ateuh ulee.
Panton bak putroe neujok keu abang
Bukon bubarang kamoe meuritee.
Bunga sikuntom di hisap kumbang
Hendak di tangkap sudahlah lari.
Akan diturut tidak bersayap
Hendak di pikat si burung nuri.
Akan menangkap siburung nuri
Pasanglah jerat di tengah padang.
Hendak di tangkap sudahlah lari
Hanyalah rupa saja terpandang.
Jikalau dapat nuri yang terbang
Ikat dikaki dengan benang.
Sebelum rupa nyata terpandang ?
Di mana boleh hati bersenang.
Meunan neumarit le po dendayang
Neujaweub reujang le bungong kumbee.
Sambelan neu iem siat neupike
Putra nyoe troh ce di dalam juree.
Cit ka neutukri linggong ngon kalam.
Ngon ureung ajam hana peuta kheun.
Meutamariet ngon ureung that lisek
Bagoe tapeutek jangka bak beuneung.
Cit ceudah that that ban batang balek
Neupham cut adek bek that meubudeung.
Cit barangkari payah that keunong
Lam pihak bingong meuakai kureung.
Meunan keuh nyang leo jinoe tanyoe eu
Beu aneuk tungku kon meu ulon kheun.
Meunan neumarit cut pari gangga
Wahe kekanda hai bungong seupeung.
Meunyang lapan boh cit ulon buka
Peulom nyoe dua kon lon keumeung plueng.
Dum jeh nyang lapan ka ulon peuglah
Meunyang dua sah nyan pih ulon kheun.
Jinoe sahaja ulon peuseumbah
Akan keu bawah kidam bungong trueng.
Meunan neunarit cut bintang timu
Meunyang cahya hu mise ban buleun.
Cut kak dendayang neukeubah hidang
Teuma neuriwang nibak cut meugleung.
Neubeuot jaroe neupeugah haba
Seurta bandua jaroe teulinteung.
Ban ban nyang narit cut pari gangga
Hana meuriba meu dube beudeung.
Oh ban neudeungoe uleh cut sari
Cit ka geutukri le sinyak meugleung.
Cut mulu sari nyang puteh meuprak
Mise ban meurak meunyang ka useung.
Teukhem teuseunyom hana meukhak khak
Cut puteh meuprak jalak meubuleun.
Ka geumarit le teuma ban lanja
Neupeugah haba di bungong seupeung.
Meuhoka gata dum kak dendayang
Nyoe eunteuk malam geuteuka ureung.
Neujak peuhase bandum sibarang
Tika ngon tilam bandum beuteuleung.
Ngon panyot tanglong bandum neupeugleh
Beukeuh beuseureh satu bek kureung.
Oh ban troh jamee bintang peureuseh
Deungon tika eh nyan bek meubudeung.
Teuma neujaweub cut putroe indah
Peutra kapeugah nyan aneuk bajeung ?
Teuma neuseuot cut sari sigra
Wahe meukuta cut bungong kareung.
Narit bak patek cit tan purbala
Bukon dusuta watee ulon kheun.
Oh ka ulon kheun nyan cit meuhat na
Bukon percuma hai pocut buleun.
Jeh euntreuk malam neu eu nyoe teuka
Dalam astana keunoe teusareung.
Meunan neumarit cut sari teuma
Teuduek nyoe haba siat le leu-eung.
Lam hate putroe cit that neucinta
Di dalam dada sangat meurubeung.
Meusambong Hikayat Gangga Pari (part 4)
Oleh : Khairul Muna
0 comments:
Post a Comment
Note: only a member of this blog may post a comment.