Peurlee geudong bukon pangkat
Tan lon harap nyan jabatan
Hanjeut lon ba u akhirat
Lon meularat deungon Tuhan
Masen sira hana ubat
Iheuh geucupat tanoeh peulham
Meubuet taduek hanya siat
Peu deurajat tapeutimang ?
Tatimang ceng beupah that that
Meuna ilat tanggong badan
Ta uroh buet akan rakyat
Sang cukop brat watee tafham
Bek neubangga oh meukeumat
Atra hanrap cit meuligan
Ban neu uroeh blah ubarat
Timu meuhat keunong ancam
Neungieng uwie supot siklap
Kameujungkat siblah jalan
Uneun pih deuh ka jisungglap
Lam busoe krat jidhoe timang
Keu meunakeun hanpeu harap
Eungkoet seakap ka meupanggang
Rumoh rayeok timah atap
Binteh meuplat peudoe intan
Tajak sare han meupingkap
Jalan ka gap na peut boh bhan
Tinggai taduek tuboh mangat
Keu keurawat tan bak badan
Tapi paloe oh taingat
Di akhirat dikeu Tuhan
Meubit tanyoe tan meuneumat
Ade hanpat nyan pakriban ?
Watee tanyoe sitang tamat
Watee pangkat cukop manyang
Hana ade teuh keu rakyat
Nyan bek harap get balasan
Keurna hudep lam peujabat
Sit hek that that tan bandengan
Siribee peng hana mupat
Han meuhoe rab tueng ambilan
Peulom jinoe lahe deuh wap
Korup siap rata gle blang
Taeu keu pruet tumbon arat
Bajee keutat raya pinggang
Maka ulon hanlon harap
Keunyan pangkat lam pimpinan
Beurangkapue lon takot that
Oh meuhadap di keu Tuhan
Seungkoe ngon krueb eungkot supat
Yang ji lumpat sit khan agam
Meunyang keunong suwiek ilhap
Ciriek pih that ka meuligan
Meunyan dalem ci neuingat
Peuna mangat duek pimpinan ?
Sahbat Nabi nyang malem that
Na meukarat oh ka keunan
Peulom tanyoe apa bangsat
Takheun ilhap pih sah hai bang
Meutan ade neuh keurakyat
Siap siap peumbalasan
Krue seumangat rimueng meukap
Glueh lam ikat ka jikuran
Meusoe peuglah singa jungkat
Sama cit that nyan makanan
Meuka meunan dalem blang jrat
Lon peusiap oh noe karang
Kon politik haba lon lhat
Cuma riwat keu piasan
Bek lon neudhot bek sit neucap
Haba bangsat mayang mayang
Meujeut neucok saboh hikmat
Jeut keu ubat saket dalam ... !!!
Oleh : Khairul Muna
0 comments:
Post a Comment
Note: only a member of this blog may post a comment.