MITA NYANG HALEU

Ammabakdu, phon tulisan.

Asoe kalam, di miyuep rhot.

Sikrak haba, dalam karang.

Keuteugasan, teuka hugop.

Apoh apah, hanpeu wayang.

Cit meuligan, beungoh supot.

Lam criet uroe, mat laseukam.

Mita jalan, peu nyang patot.

Patot bak buet, get meuligan.

Bajee dalam, lhat bak sangkot.

Dak raseuki, haleu han ban.

Kon tajak tran, atra lam got.

Bukon tacok, laen barang.

Hak ta kuran, nyang han patot.

Abeh janda, ta peuwayang.

Keu alasan, golom jeut beot.

Abeh fake, ka takuran.

Sikrak geo lham, tatem kawot.

Abeh bijeh, pade lam blang.

Roh lam badan, tanyoe cugot.

Bacut leubeh, peureumpuan.

Leo piasan, bak teugijot.

Ureung binoe, mugee kutang.

Bajee salang, geuyue reubot.

Rata kuta, meukat barang.

Bak piasan, kanceng ka rhot.

Kueh sikrek, abeh cit han.

Jeut meukuyan, yuem laba bret.

Alah e Poe, peuka lon tran.

Ka salah cang, arah sugot.

Muga tanyoe, bek lagee nyan.

Bah gob meunan, nyang peulagot.

Nyoe meunan buet, hanget waham.

Nibak Tuhan, teuh geucarot.

Dali bak buet, leumah cit trang.

Hareum jalan, han ta surot.

Kuta sigli, kon bubayang.

Indah han ban, troh u garot.

Pubuet jinoe, haleu talhan.

Dak lam badan, get meu atot.

Dak ta puwoe, keu ma sigam.

Keon ji kuran, meunakeun krot.

Dak pih tabri, bu keu tuwan.

Rasa seunang, teuh han kuncop.

Tajak u gle, koh tualang.

Meu tagulam, beuget bek rhot.

Lon peu akhe, oh noe peusan.

Meungka neufham, muka bek krot.

Oleh : Khairul Muna