MAKANAN HAREUM IKOT MANIKAM

Meuseubab tuleung, kulet bak badan.

Tajak han ceukang, taduek pih mangat.

Salam'alaikom, mula phon kalam.

Saleum lon layang, jaroe ta mumat.

Beureukat nini, nektu teuh adam.

Geutanyoe insan, peuneujeut umat.

Tapi mula nur, nibak janjongan.

Rasul tauladan, Nabi Muhammad.

Beureukat guree, keu ulon tuan.

Ilmee lam badan, jinoe ka jimat.

Uleh keurana, hai keu mudian.

Bah lon meurantam, di dalam riwat.

Haba lon tuleh, ireh han leukang.

Meubit meuligan, bek neukheun meucap.

Lon manusia, cit leo han faham.

Maklum hai rakan, meubek na seubab.

Seubab meugareh, meucureh kalang.

Ngon batee itam, laju tasikat.

Nyoe seubab peudeh, nyan peurasaan.

Beh pat hai rakan, lon mita ubat.

Lam kuta cikok, alamat lam blang.

Kadang gampong nyan, leo hana tupat.

Keu mukaddimah, bek le that panyang.

Jinoe hai taulan, ta tamong lam bab.

Nanggroe beureunuen, ramee that peukan.

Lampoh awe blang, ramee meuneukat.

Hudep geutanyoe, mula phon lajang.

Beutateuoh fham, pakriban syarat.

Hukom iseulam, beutanyoe reugam.

Minom ngon makan, bek roh nyang laknat.

Laknat keu tuboh, hareum geupeunan.

Bek meuka talan, laju ka takab.

Meubek tapajoh, bangke makanan.

Atra gob tacang, taniet ka nikmat.

Jeuneh lam tuboh, meuwoe MANIKAM.

Jatoh ke lubang, sinan phon jimat.

Oh na peureumoh, ka akhe lajang.

Hareum makanan, nyan jitreon seubab.

Oh taseutuboh, nibak simalam.

Akan MANI nyan, bagah meuleukat.

Ban ka meuleukat, meuwoe keu insan.

Hantreb teulheuh nyan, lahe ban nyang zat.

Teulheuh ban lahe, rayeok aneuk nyan.

Kadang pih kadang, jeut keu peujabat.

Oh ban kajeut jih, nanggroe lam reugam.

Dum seukalian, ka jipeusapat.

Han meuri hak droe, atra gob jilhan.

Hana di sayang, beuthat hak rakyat.

Teuma gob laen, laju ka geufham.

Meuyang di manyang, hana AMANAT.

Amanat keu get, cit brok geuseukang.

Seubab makanan, HAREUM YAH JILAT.

Hareum nibak yah, rhot lam MANIKAM.

Meuwoe keu badan, jiturot leugat.

Adak pih POMA, ureung gob seugan.

Teutap hareum nyan, ji ikot meuhat.

Nyoe lon PEUCONTO, saboh ngat neufham.

Ie krueng arongan, geutarek lam krat.

Kulah di rumoh, meukilat han ban.

Ban tauet kalang, jidu meukarat.

Kulah cit ka gleh, sapue tan leukang.

Laju nibak KRAN, geutanyoe peurab.

Oh ban ji ek ie, KAKUNENG HITAM.

Pat KEUSALAHAN, cuba peuleungkab ?

Beh keu jeunaweub, jinoe lon peundam.

Soe baca karang, neufham beuleukat.

Haba ka habeh, tambeh ka padam.

Adak sambungan, tanle ulon lhat.

Note : tapasang pipa lam krueng arongan, tatarek ie keunoe u rumoh tanyoe. Kulah cit kalheuh tapeugleh pokok jih ka beureuseh hana meuligan sapue le. Oh ban tabuka KRAN ie jih kakuneng itam.

Yang jeut keu pertanyaan :

PUE IE KRUENG SALAH, PUE KRAN YANG MEUGEURATAN ATAU PUN KULAH ?

Maka dari hai nyan, bek lah tapajoh MAKANAN HAREUM, dari makanan hareum nyan jeut aneuk geutanyoe keu PANCURI.