NARIT BINOE

Saboh narit, ureung binoe.

Deungoe lon preo, hai saudara.

Tunong baroh, aduen adoe.

Ingat putroe, ban sineuna.

Keu peuneugah, suroh bak Poe.

Akan jiwoe, jiduek dosa.

Saboh narit, salah bak droe.

Luka asoe, jeub anggota.

Meutamarit, deungoe lakoe.

Wahe binoe, ban ie saka.

Leumah leumbot, ngon ie gigoe.

Bek meuka groe, ta bicara.

Meutamusu, meudhot bek toe.

Bek beuranghoe, tuto bahasa.

Keurna sinan, that seumaloe.

Uroe uroe, beu tajaga.

Miseu tayue, ubak lakoe.

Yue lah adoe, get bicara.

Bek su nyang lheuh, meukeu luboe.

Akan paloe, akhe masa.

Akhe masa, nyan ubak Poe.

Geu seumanoe, lam nuraka.

Ngon ie timah, neujeb beutroe.

Gigoe gigoe, cit binasa.

Siksa sabe, jeut jeut uroe.

Han cit tuwoe, meu simasa.

Seubab siksa, narit budhoe.

Nyang keu lakoe, dalam dunya.

Laen pih dum, meuta rampoe.

Han seuleusoe, taboh makna.

Jinoe saboh, lon peu sampoe.

Singoh adoe, lon bri dua.

Treb nibak treb, cit seureuleo.

Meuneupakoe, ajeb han sa.

Dak neuamai, hana rugoe.

Laba dudoe, cit neurasa.

Han neupateh, akan keu nyoe.

Lon han rugoe, bak meurika.

Keurna sayang, lon keu adoe.

Maka lon preo, saboh haba.

Koh seumantok, bek gogajoe.

Neucah raboe, jeut ban suka.

Haba antok, kajeut oh noe.

Singoh dudoe, laen lon ba.

Oleh : Khairul Muna