HIKAYAT GANGGA PARI (part 2)

Meurumpok Ngon Putroe

Ilustrasi

Pucok bak maken luhu meuasoe

Jiteot le uroe patah jih cit han.

Suai yang keu peut neutanyong leugat

BEH PEU NYANG RAB THAT DI DALAM ALAM ?

Nyang han ek sampoe ngon ta itihat

Neupeugah siat wahe buleun trang.

Kamoe han sanggob jeunaweub suai

Leo dum ka kanjai hai pirak upam.

Teuma neujaweub le pari gangga

Deungon suara cut nadum santan.

Leumak ngon maneh hana ngon peusa

Cut pari gangga oh neuneukalam.

Reumok lam hate cut putroe muda

Sang nyum neurasa ka neuduek sajan.

Teuma neumarit cut bungong pade

Nyoe tadeugoe he bandum beurahman.

MEUNYANG LEUBEH RAB CIT AJAI MATE

Ban mandum sare nyoe seukalian.

Miseu ka lusa hanjeut cit singoh

Meungka oh beungoh hanjeut oh malam.

Meungka nibak krueng hanjeut nibak mon

Cit meunan bangon bute neuh le Tuhan.

Meungka di luwa hanjeut lam rumoh

Watee ka punoh cit hana kurang.

Meunan neunarit cut pari gangga

Bandum peundeta meunoe neukalam.

Cit beuna sangat wahe aneuknda

Ban nyang kheun gata ubah cit ka han.

Han meungsigeutue cit meuri riba

Nibak pham hamba cit kanyoe meunan.

Dum barangkasoe han ek le dakwa

Narit cit beuna hai pirak upam.

Neujaweub putroe nyang that juhari

Kanibak kami nyan cit beunaran.

Bit hana daya nyoe ulon ungki

Keu haba suci bit hana macam.

Ulon teurimong nyoe ka glah PEUT boh

Meunyoe lom saboh ci neuyue peutrang.

MEUPEU NYANG MANYANG BANDENG NGON LANGET ?

Neutanyong leugat wahe beurahman.

Teuma neujaweub le putik langsat

MEUNYANG MANYANG THAT KEUMULIAAN.

Keumuliaan ngon manusia

Di dalam donya seusama insan.

Meunyan nyang manyang wahe peundeta

Laen cit hana nyang meunan macam.

Beh ci neupeupham deungon keunira

Salah ngon beuna neupeugah rijang.

Tungku beurahman neujaweub teuma

Bit sangat beuna hai meuh keunarang.

Cit hana daya deungon upaya

Ulon neuk dakwa hana le jalan.

Ban ban nyang titah nyan maha raja

Hai bungong jeumpa nyang that andalan.

Jaweub le putroe wahe pendeta

Kanibak hamba cit terimakan.

Kasreot lom tiree mise nyang ka ka

That keumulia nibak keunarang.

Ajeb that hate bit hana tara

Bandum peundeta muka neuh masam.

Tabeoh geo cangkoi meubek trieng muda

Sigoe tahila cit laju simpan.

Alah hai Poe lon Tuhan lon Allah

Neubri keuh mudah ulon keumarang.

Padum droe rakan ka neukirem su

Yue sambong laju hikayat ngat trang.

Keurna lam hate teurasa su uu

Pakriban laku lom keumudian.

Keurana seubab treb ka ulon lheung

Hanya na meutheun ulee han reumbang.

Uroe lon keurja meuikat batee

Beh panee lagee meujaga malam.

Teuma ka jinoe nyoe kana watee

Nyan cit ia teuntee lon bri sambungan.

Lagi lom ajeb cut gangga pari

Seureuta ahli ilmee lam badan.

Neupeumeuah lon wahe pembaca

Rakan seutia bek chok ngon waham.

Cit ulon sambong bandum ceurita

Siap seudia akan rangkuman.

Reot blah deh tambue meunasah asan

U barat lheuh nyan calok meubeuntang.

Bek ka sep jilee haba meucakra

Cut pari gangga lon puwoe rijang.

Teuma lon suai cut putroe tanyong

Nyan pocut bungong nyang that andalan.

PEULEUBEH TUTONG KANIBAK APUI ,

PUE NYANG THAT RULUI JI DALAM ALAM ?

Cut pari gangga neujaweub pantah

Teuma neupeugah le deungon that trang.

Meunyang that tutong wahe khalifah

NYAN KEUH AMARAH LAM HATE INSAN.

Cit hana laen nyang tutong that that

Nibak lat batat dum dalam alam.

Meunan ulon pham dalam etihat

Kaulon takat bak undang undang.

Jaweub beurahman deungon peundeta

Sabet that beuna hai meuh teu upam.

Bit meusigeutue nyoe hana salah

Hana meuminah nibak seunanggam.

Teuma neujaweub le tuan putroe

Wahe guree droe but that beunaran.

Ulon teurimong bandum sibagoe

Nyan tuan putroe meunan meukalam.

Kasreot lom tiree meurudiwangga

Cit nam lapeh ka nyan keusudahan.

Tinggai dua teuk trek tiree rawa

Meubreng breng cit ka deuh putroe intan.

Di tuan putroe cit keunan mata

Keudeh u luwa bak teungku abang.

Sang sang karab deuh nyan bacut rupa

Di putroe muda ka mabok mumang.

Bak sang adak jeut cit jiteureupa

Meunan ka rasa nibak lakuan.

Teutapi hate seb brat neusaba

Ingat keu nama meubek ayeban.

Lom ka neumariet cut putroe muda

Ubak peundeta kaneupeugah ban.

PEU NYANG THAT SIJUEK WAHE PEUNDETA

Nibak sigala di dalam alam.

Neuseuot teuma le pirak lipat

Neukheun le leugat cit meunoe macam.

NYAN MANUSIA MEUNYANG TROH HAJAT

Meunyang sijuek that bit hana lawan.

Hana nyang laen meunyang sijuek le

Hana tamise deungon teuladan.

Meunan nibak lon meunyang meusampe

Di pocut kande neuiem beudiyam.

Bandum na guree teuma neuseuot

Ateuh that patot wahe cut intan.

Han meung sigutue hana meusangkot

Meunyang meulimbot mise boha mamplam.

Bit sangat beuna hai bungong meulu

Cit meung sigeutue ta ubah jih tan.

Keubit pih meunan hai aneuk tungku

Ban ban nyang nabsu nibak sulotan.

Jitreon le sabda nibak cut putroe

Neukheun le meunoe le cut pilehan.

Meungbit ka beuna nibak guree droe

Cit nibak kamoe ka teuleubehkan.

Ulon teurimong wahe e guree

Mise ban dilee ulon kabuikan.

Meunan neumari le putik sukon

Meunyang meudulong cit bungong karang.

Deungon rupa jroh tamise tanglong

Bit that meunanggong kadeungon badan.

Meunan keuh wahe e tungku ampon

Awai deungon phon oh sampe khatam.

Ie dalam laot cit jroh meualon

Watee riyeuk treon cit meukarang lhee.

Su-eue ka keunong pocut meuhubon

Jeunaweub tanglong pih ka meuteuntee.

Pakhok ngon buhue ka ulon gantoe

Bek lagee baroe hana get lagee

Ureung nyang baca meuri sang beu oe

Bah ulon puwoe buhue lon peusee.

Teuma jitanyong lom le putroe ti

Kabeh ji sudi bak bungong kumbee.

Wahe e guree lon nyang that ahli

Nyoe pat lom lagi jeut jeupeuteuntee.

PEUNYANG TA GASEH DALAM DONYA NYOE ?

bandum geutanyoe wahe e guree.

Ci neuyue peugah ka ubak kamoe

Di ulon teu nyoe akai that padee.

Teuma neujaweub cut pari gangga

Hai bungong jeumpa meunyang mangat bee.

nyang that geugaseh le manusia

MEUNYAN KEUH DEESYA HAI TUNGKU GUREE.

Bit that geugaseh akai seunulet

Cit meunan sabet nyan jeub jeub watee.

Beuthat pih abib nyan bangsa sayed

Akan seunulet gaseh neuh teuntee.

Oh ban jideungoe nyang meunan haba

Bandum peundeta neutumpang ulee.

Bit sangat beuna wahe mutia

Ban nyang kheun gata wahe aneuk kee.

Cit meungsigeutue nyan tan meuriba

Sang sang meucab ka jeh nibak batee.

Dum umu ulon nyoe bit katuha

Hana tom haba dumnoe pih teuntee.

Cit hana daya ngon ulon tulak

Sibeuna bak hak wahe pang ulee.

Cit tan meuriba nyan meungsitapak

Hana meuriak meudube gutee.

Kajicom jaroe cut pari gangga

Bandum peundeta hai tungku guree.

Si ja'ek mata deungon geulinyueng

Cit sijuek rukueng ulon han lagee.

Bit sangat beuna wahe bungong trueng

Ban nyang gata kheun bit that meuteuntee.

Kanibak putroe jitren le sabda

Wahe peundeta dum tungku guree.

Meungbit ka beuna dum nibak gata

Cit nibak hamba di ateuh ulee.

Ulon teurimong wahe beurahman

Nyoe kaglah lapan bandum ka teuntee.

Rakna hikeumat neudeungoe meunan

Tiree le yoh nyan ka jilhom meupree.

Cut putroe muda leumah meubayang.

Ka deuh neupandang le bungong kumbee.

Nyan tiree wangga cit ka jigeureub

Meunyang meusalob bukon ban dilee.

Cut putroe muda meunyang jroh sifeut

Di po bintang cut sang meuh neu uree.

Ka sare leumah cut putroe muda

Di pari gangga neuguyang ulee.

Bak sang hana le karoh lam dada

Hana le haba cut bungong kumbee.

Bit putroe jroh that cit meucuaca

Allah e hai ma nyoe pakri lagee.

Bit hana lawan nyang barangkari

Get that juhari cut bungong kumbee.

Ka sabe keunan neupandang mata

Cut pari gangga hana le malee.

Di cut putroe ti pih keunan mata

Sigoe bandua mata neuh meusee.

Tamise haba neukheun meulayu

Alah segitu haba lon tiree.

Bukon ulon tueng bak babah tungku

Bukon cit laku bak buet meuguree.

Di anak cina pandai berburu

Terbang burung cenderawasih.

Hilangnya iman kerana nabsu

Hilangnya malu kerana kasih.

Malee pih tanle nyan pojroh rupa

Ka keunan mata cut bungong seukee.

Han meungsigeutue le neupeugisa

Sigoe bandua takaleon lagee.

Ka jikaleon le cut mulu teuma

Hana get rupa nyoe meunan lagee.

Bak akhe dudoe jeut keu ceulaka

Meunyoe ban dua hana le malee.

Nyan salah saboh antara dua

Cit jiteurapa nyan meuhat teuntee

Meunan neupikee cut mulu sigra

Jikheun le lanja ka ubak guree.

Neudeungoe kamoe wahe peundeta

Tapeu mumada uroe nyoe jilee

Bahle lom singoh nyoe tapeumula

Lagi pih nyoe ka troh nibak watee.

Laju ka jimat ka ubak jaroe

Di tuan putroe meunyang mangat bee.

Ka tinggai sinan nyan po samlakoe

Ngon sikureung droe tamah ngon guree.

MEUSAMBONG Hikayat Gangga Pari III

oleh : Khairul Muna