Denden lam paya, meuruwa lam krueng.
Di aneuk udeung, roh lam seureungkap.
Salam'alaikom, wareh nyang ranum.
Adoe ngon aduen, bandum lon kasat.
Si jeumpa puteh, meutindeh di leun.
Sideh lam lubeung, meutabu lalat.
Sikrak lon peugah, haba reot jangeun.
Neudeungoe bandum, timu ngon barat.
Saboh peuneugah, haba Nabi kheun.
Jinoe ulon leung, neudeungoe siat.
Adak ka seureng, neu peugeulinyueng.
Teutap ulon kheun, meusaboh radat.
Aneuk sireuheung, ka jipoh le kleung.
Jeh aneuk rimueng, hanpre ji meukab.
Haba lam tambeh, azhan mendengung.
Oh watee tatueng, tanyoe ibadat.
Tanda nyan adoe, rab rata ruweung.
Bansigom bandum, timu ngon barat.
Tunong ngon baroh, darat deungon krueng.
Cit sare geukheun, keubit that mangat.
Tapi nyang paloe, wareh si bulueng.
Oh su mendengung, han tanyoe santap.
Ladom bak laloe, teungoh pileh kreung.
Han ta peureumeun, keunyan meu siat.
Ladom lam tika, teungoh geu madeung.
Poma meunaguen, laloe geuh that that.
Han geupeudeungoe, peujeh ka geukheun.
Laloe teuh bandum, ngon buet meukarat.
Di paloh gadeng, tabeng meusinteung.
Leo that ta teumeung, ureung ibadat.
Meungka su azhan, ta peugeulinyueng.
Oh nyawong geutueng, geubeot pih mangat.
Badan tanyoe phui, sapeu han kureung.
Dak sidroe ureung, ek geugrak leugat.
Hana meudaleh, lileh bak tuleung.
Tanda geulunyueng, sabe geupeurab.
Miseu ban azhan, gadoh ta madeung.
Manyet tuleung rueng, geubeot singoh brat.
Weub dalam donya, han ta peureumeun.
Oh azhan aduen, tanyoe laloe that.
Adak si ploh droe, meusapat ureung.
Wah meuglueng glueng, geuba lam jeurat.
Meunyan keuh manyet, brat hana bangun.
Geudeungoe jareung, meu azhan jeh pat.
Di blang teumulek, leupah jai neuheun.
Asoe jih udeung, dalam jih leo that.
Haba lam tambeh, oh noe lon sinteung.
Miseu bit neutueng, lon syukur bak Rabb.
Meunghan neupateh, wareh lon bandum.
Sia lon peuplueng, saboh ijtihat.
Hana masalah, laju ulon kheun.
Mungken lam ruweung, goh na soe cupat.
Note :
Rasulullah SAW bersabda
Jangan pernah berbaring (tidur) ketika adzan berkumandang, nanti jenazah kita akan sangat berat ketika di tandu.
Baca juga : Larangan Adzan yang Berujung Perang
Oleh : Khairul Muna
0 comments:
Post a Comment
Note: only a member of this blog may post a comment.