HIKAYAT GANGGA PARI (part 5)

Putroe Rakna Hayati

Aneuk leuk meulot, di ateuh rambot

Teuma di got got, jidoeng meukawan.

Lon sambong kisah, pakri nyang patot

Bek ribot ribot, inong ngon agam.

Meutan neubaca, meubek neupeurhob

Takot karu gob, droe neuh di kuran.

Meunyang na minat, sit sabe ladat

Geuniet meundapat, ie mon kalkousar.

Keu ureung candu, bek tajok bakong

Cit troh ija krong, jibalot sikhan.

Meunan cit hai lom, keu bah hikayat

Yang galak that that, hanpeu ta sugang

Keunoe ta sugang, keudeh geubanteng

Pokok nya polem, cit beupueh badan.

Adak ceurita, bagoe mie kureng

Geu anggap eh krem, oh tee pacaran.

Hana geutupue, yang karang laen

Cit hana seureng, nibak buet nyoe sang.

Sit ureung bangai, hana si kula

Nyak khairul muna, wahe e taulan.

Adak pih meunan, lon hana malee

Muka lon peusee, dalam fikiran.

Supaya ngat jeut, ulon srap ulee

Bagah meuteuntee, yang nyoe karangan.

Keululu uteun, meupalet palet

Ateuh sirihet, jipalet badan.

Lon puwoe kisah, keu ponek siti

Ubak putroe ti, kaneujak reujang.

Cit neujak laju, hana neukaleon

Hate geuh teudong, leungoe fikiran.

Teuingat ija, peukalheuh golom

Yang beukah reudom, peuka teunampai.

Neumarit dudoe, cut mulu sari

Hai ponek siti, katroh neudatang.

Beh teoh pakriban, ci ku eu ija

Peu kaseudia, nyan meukab pulang.

Ponek neuseuot, teuma le leugat

Cit hana meupat, wahe buleun trang.

Kahabeh jieu, bandum dilihat

Hana ditupat, beukah jih lapang.

Meunyang keuh yang jeut, nyoe diyue puwoe

Ci neuhareutoe, dipat nyang reunggang.

Cit jimeung peugot, uleh samlakoe

Jinoe hai putroe, neutinyok beutrang.

Teuma neujaweub, nyan putroe muda

Bit bit ceulaka, nyoe datok suwang.

Baroe kon kalheuh, nyan kupeunyata

Bit buta mata, hana ka pandang.

Kacok hai mulu, leugat beupantah

Aci kapeugah, peuleumah rijang.

Phon phon barokon, kalheuh kupeugah

Bit hana lom sah, nyoe datok suwang.

Cut mulu sari, neucok le teuma

Ka jipeuriksa, deungon bungkosan.

Di ateuh pih na, geu eu meusurat

Teuntang alamat, pocut andalan.

Cut mulu sari, get that ajaib

Keubit jroh that that, yang nyoe bungkosan.

Jiploh le bungkoh, laju le leugat

Lansong jilihat, ubak nyang lapang.

Habeh jikalon, cit jeub jeub teumpat

Hana jitupat, nyan le bekasan.

Laju le jiba, ka ubak putroe

Kajipeugah prow, ju reujang reujang.

Ampon e pocut, hai raja nanggroe

Neu eu ija nyoe, ka meukab pulang.

Habeh ulon eu, wahe e deelat

Hana nyang sapat, cit nyang laheran.

Beukah nyang dilee, hana le meuri

Sikali kali, ajib hana ban.

Cut putroe teuma, kalon laju le

Ajib that hate, bit hana macam.

Bit bit nyoe bijak, cut bungong pade

Sit hana mise, dengan teladan

Teuma le neukheun, ubak nek siti

Jak leh kembali, wahe nek intan.

Ija yang beukah, hana le meuri

Leh saleh pakri, ka meukab pulang.

Jinoe hai ponek, nyan beutapeugah

Beutaseuleuah, gaseh ngon sayang.

Harap di ulon, beukeuh neupeugah

Meunan sang nyang sah, hai ponek badan.

Cut mulu sari, le di meupanton

Meu ek ngon meutron, di mata hitam.

Di tapak tuan, gunong meuapet.

Aneuk seurindet, ateuh bak meudang.

Lon harap e nek, bukon sediket.

Ubat peunyaket, nyang lara badan.

Allah laju on, meusisek naga

Teuma on jeumpa, on salah sari

Peu ubat keuh lon, nyang saket dada

Neupeugah sigra, hai ponek siti

Di ponek siti, teuma neuseuot

Laju geubeuot, jaroe meulayang.

Meubek tuan ku, nyang hana patot

Nibak si untot, neuboh pakaian.

Yang hana layak, bek tapeulayak

Miseu kon nyang hak, beh pane reumbang.

Bek di antara, nyan cuco hamba

Dum raja raja, pih gadeoh agam.

Dua beurahman, deungon peundeta

Cut teuhing saja, sang sang plok teukam.

Meunan neumarit, le ponek tuha.

Cut rakna cinta, lom neumeukalam.

Beh bek hai ponek, nyan meunan bala

Meubek tasangka, yang meunan waham.

Oh tee neu eu lhok, tuwi nyang raya

Meubek neusangka, buya di dalam.

Di ateuh sarah, kadang nyan pih na

Hana troh duga, bak hate insan.

Eeleumee nyang le, bit hana mupat

Bukon nyang meuhat, bak alam nyang trang.

Kadang cit kadang, nibak si bangsat

Hana tatupat, hai ponek intan.

Ponek neubeudoh, laju le neuwoe

Ka urumoh droe, leugat neu jalan.

Wahe e cucoe, cut bungong geutoe

Jeh ija baroe, ka meukab pulang.

Kahabeh dumpue, teuma geupeugah

Cut bungong taufah, teukhem le yoh nyan.

Peuroe hai ponek, meunyan masalah

Cut putroe indah, meunyang that dendam.

Dilon hai ponek, tan ulon tukri

Ulon abeudi, cit saboh dagang.

Lon hana mupat bunda ngon abi

Keu nanggroe nyan pi, lam rimba tuhan.

Teuduek nyoe siat, keu bintang pari

Rakna hayati, ulon peuriwang.

Oh leupah neuwoe, nyan ponek siti

Cut mulu sari, lom neumeukalam.

Ampon e pocut, nyang mat neuraca

Nyoe bungkoh ija, get that andalab.

Nyoe cit pakaian, di raja raja

Laen kon bala, sibarang datang.

Bak patek kalon, sang meunan rupa

Dalam keunira, lon undang undang.

Teuma neujaweub, di rakna cinta

Sabet bit beuna, nyoe ban lakuan.

Dikee lam hate, nyoe mantong susah

Keu nyoe masalah, bit golom get trang.

Cut gangga pari, bit rancak leupah

Oh tee jipeugah, bak ulon peupham.

Meunan neumarit, cut putroe rakna

Uroe ngon sinja, luho ngon malam.

Hate neuh susah, bit hana tara

Sang sang meutia, diteungoh malam.

Hingga pih malam, ka jula laju

Neujak beuradu, cut putroe intan.

U ateuh tilam, dalam keulumbu

Cut bungong meulu, nyang that andalan.

Putroe teungeut le, cit leunyab sudah

Grak nibak Allah, nyang sidroe Tuhan.

Ie laot ribot, ngon geulumbang

Aroh meu topan, siat oh malam.

Haba lon balek, keu sidroe raja.

Meunyang po kuta, jagat seubeurang.

Keunan nanggroe nyan, sani purpita

Peut aneuk raja, sakti hana ban.

Aduen nyang tuha, yang mat keulola

Nyan keuh jih raya, yang mat sulotan.

Raja nyan keunan, akob gumpita

Adek keudua, si jabat lanan.

Teuma yang keulhee, nyan syah gumpita

Peut syah peurkasa, nyan adek abang.

Di taklok keunan han peu tapeugah

Subahanallah, cit laksin laksa

Deungon hareuta, get that barullah

Guda ngon gajah, han ek takira.

Raja nyan ban peut, get that andalan

Adek ngon abang, get that peurkasa.

Peulom nyang tuha, akob gumpita

Jithee le raja, bansigom dunya

Di bijaksana, deungon tauladan

Meunyan hai taulan, akob gumpita.

Akai geuh tajam, bit hana bagoe

Cit tan meusidroe, deungon tapeusa.

Bandum na hukom, di dalam nanggroe

Cit bandum sampoe, ka keunan jiba.

Ngon hukom seunang, putoh ban siat

Ngon sidek sasat, kureung cit hana.

Akob gumpita, meunyan sulotan

Get that pahlawan, deungon peurkasa.

Jroh that meusambot, ka deungon badan.

Ngon raya panyang, raja ceulaka.

Lom deungon sakti, bit hana bagoe

Adak barangsoe, cit tan jitaba.

Padum nyang leo ka, jijak prang nanggroe

Hana meusidroe, lawan nyang padra.

Ka deungon rupa, get that meusambot

Teuma ngon janggot, na ube raga.

Oh tee takalon, rasa teumakot

Deungon hitam lot, bak sang sang bangka.

Taeu oh jinab, bak sang peuluntueng

Oh taeu di rueng, bit mise waba.

Oh tee takalon, sit beuka taplueng

Cit hana ureung, meunan nyang ka ka.

Oh di seumeupoh, nyawong teuh sampoe

Adak barangsoe, han ek di sangga.

Cokma ngon peudeung, get that seureuloe

Meunyan keuh beusoe, raya ube pha.

Teuduek keuh siat, akob gumpita

Keu laen haba, lom tapeugisa.

Akob gumpita, nyang that asalan.

Na keudengaran, nyan saboh haba.

Meugah na putroe, di cikok kuta.

Ka deungon rupa, cantek that muka

Bit cantek maneh, nyan tuan putroe

Dak jeub jeub Nanggroe, hana deungon sa.

Hana ngon bandeng, laen meusidroe

Ta mise putroe, cut rakna cinta.

Ban raja deungoe, hate beurahi.

Meunyan syah doli, le jatoh sabda.

Wahe e adek,cut jabat lanan

Ulon that deundam, saboh peukara.

Ulon meunabsu, cut putroe intan

Nyang nan andalan, cut rakna cinta.

Jinoe hai adek, surat beutabri

Keu putroe ahli, ulon meungcinta.

Keu aneuk raja, nyan cikok kuta

ulon that suka, wahe adek nda.

Di jabat lanan, nibak masa nyan

Surat kireman, yue peugot sigra.

Neuboh ngon haba, bit meuatoran

Ban meujeulisan, bak raja raja.

Oh teulheuh surat, neuboh deungon cap

Geuyue jak intat, laju le sigra.

Neumeuhoi sidroe, nyan ulee balang

Deungon angkatan, cit ban sikada.

Kageuyue bungka, laju le reujang

Jak mee kireman, sabda bak raja.

Di ulee balang, ka jibeujalan

Deungon angkatan, dan balatantra.

Na padum lawet, ka perjalanan

Sampoe le yoh nyan, u cikok kuta.

Ka jijak laju, le jipeutupat

Kheundak meuhadap, bak poteu raja.

Katroh le keunan, ka deungon siat

Bandum na rakyat, suroh le raja.

Ka ubak meuntroe, le kedengaran

Leo that angkatan, troh dari luwa.

Yoh nyan di meuntrow, ka neubri ureung

Ka neuyue jak kheun, nyan pane teuntra.

Ka jiteubiet le, nyan ulee balang

Nibak angkatan, yue jak pareksa.

Wahe syedara, ho Tabeujalan

Leo that angkatan, pane tateuka.

Ulon eu tajak, jroh that meurempam

Deungon angkatan, leo that dum tantra.

Tapeugah jinoe, laju beurijang

Gata nyoe soe nan, nyang teoh keupala.

Di ureung teuka, ka diseuot le

Sani purpita, nyoe kamoe teuka.

Suroh bak raja, akob gumpita

Keu putroe rakna, sirat geuyue ba.

Hingga keuh teuma, haba nyoe yang rab

Tamong le leugat, nyan ureung teuka.

Neupeumulia, ban laku adat

Neubri ngon teumpat, nyang that mulia.

Ka beungoh uroe, cahaya bandrang

Ji meusu gendrang, ngon canang raya.

Alamat putroe, cut rakna bintang

Teungoh seumanyam, di ateuh tahta.

Di dalam tiree, neumeukeurawang

Blet blot that intan, jiplung ngon cahya.

Di ureung teuka, katroh le keunan

Neu ek le yoh nyan, ubalee rakna.

Neubeuot jarow, neuduek teusumpam

Ngon deelat tuan, nyan maharaja.

Teulheuh neusembah, neujok ngon surat

Ka neuyue lihat, le po meukuta.

Patek tuanku, hana troh dapat

Di dalam surat, aleh peu haba.

Ngon sabda raja, ka ubak meuntroe

Tabuka jinoe, wahe mamanda.

Teuma le meuntroe, neubuka surat

Neubeut le leugat, ban sikutika.

Meunoe keuh haba, di dalam surat

Nibak halarat, nyan maharaja.

Ka nibak raja, akob gumpita

Sani purpita, nyan nanggroe raya.

Mudah mudahan, hajat sampoekan

Keupada intan, cut rakna cinta.

Raja meubangsa, usui pilehan

Areh budiman, keumala donya.

Deungon sigala, wazi ngon meuntroe

Di dalam nanggroe, nyan cikok kuta.

Hajat di ulon, peudua nanggroe

Beujeut keuh sidroe, tamat neuraca.

Cikok kuta ngon, purpita sani

Meubek keuh meuri, ureh ngon tanda.

Bungong nyang keumang, taman biduri

Kumbang menyeri, akan madunya.

Di encek ahmad, ureung palembang

Kapai jeumeurang, laot sikatra.

Ulon meunabsu, keu bungong karang

Nyang teungoh keumang, jroh that meucahya.

Bungong sunteng meuh, tatah maknikam

Meunyan peukaian, raja meutahta.

Surat sipucok, minta balahkan

Jikalau tuan, sudikan hamba.

Bungong sunteng meuh, intan meutatah

Sandusen peut drah, peukayan raja.

Meunyoe he intan, surat tabalah

Bek ngon keureutah, wahe adeknda.

Meungtamat pih bek, he bungong teuprom

Taingat manteong, di dalam dada.

Meunan habaran, di dalam surat

Jaweub le leugat, cut rakna cinta.

Yang puteh puteh, cit bungong riwat

Ban mise kulat, jih teungoh beukah

Ka neumeusabda, le raja deelat

Cut pirak lipat, nyang that meutatah

Wahe mamanda, neujaweub surat

Nyan keu halarat, raja nyang meugah.

Jeut neubri maklum, ka ubak deelat.

Nibak lon that that, sangat bit indah

Haba ka nibak, nyan poteu raja

Nibak jeumala, ka ulon keubah

Saboh ngon siploh, kanibak hamba

Get that mulia, hanpeu tapeugah.

Bit pih ka meunan, hai mamanda droe

Neuyue hareutoe, bandum masalah.

Nyan masaalah, cit lapan bagoe

Ci neutanyong proe, ubak kalifah.

Meungbit ek hase, bandum sinaroe

Kanibak kamoe, saja sit keumah.

Bek an antara, nyan raja nanggroe

Dak beurangkasoe, bak ulon indah.

Beuthat pih aneuk, nyan barangkasoe

Meunyan keuh lakoe, diulon nyang sah.

Meunyoe bit han ek, nyan geupeuhaba

Dak beuthat raja, tan ulon indah.

Kanibak ulon, cit hana suka

Soe hanjeut daya, nyan masaalah.

Meunan neumariet, di po jroh rupa

Kanibak raja cit neuyue peugah.

Geuyue peugot le, nyan surat sigra

Neuboh ngon haba, meunyan that indah.

Surat pih hase, neuboh deungon cap

Kageuyue intat, nibak kalifah.

Meusambong : Hikayat Gangga Pari (part 6)

oleh : Khairul Muna