HIKAYAT GANGGA PARI (part 4)

Putroe Rakna Hayati

Ngon ammabakdu, lon pujoe Tuhan

Meunyang poe alam, seugala bidang.

Allah tapujoe, bek sagai tuwoe

Malam ngon uroe, beu ek tapaban.

Ingat beu ingat, hudep geutanyoe

Hana treb tawoe, dunya tatinggai.

Sideh keuh singoh, neuduek geutanyoe

Hanle geunantoe, wahe e taulan.

Beurangpue bak buet, tapujoe Allah

Cit neubri mudah, ka uleh Tuhan.

Kiban Lon pubuet, karang hikayah

Cit hana susah, dalam fikiran.

Seubab hate gleh, karang naseukah

Ulon peuseumbah, keu adek abang.

Mangat neutuban, atra keu neubah

Indatu nyang sah, meunyang po makam

Meukon indatu, keuneubah asli

Pane keuh gob bri, ilmee hai rakan.

Maka peubeudoh, tanyoe peu bangket

Meubek le pijet, bandum jikuran.

Manok jimeulot, that kameh kamoh

Dimiyueb rumoh, nyan manok agam.

Jinoe lon ulang, alur lam kisah

Ulon peubagah, laju hai taulan.

Ponek neubeudoh, laju ka neuwoe

Nibak samlakoe, neujak peugah ban.

Wahe e cucoe, si bungong geutoe

Cut raja putroe, meunoe neukalam.

Kajiyue tanyoeng, keu upah ija

Kanibak gata, wahe buleun trang.

Kalheuh lon peugah, siploh rupia

Tapi han suka, cut putroe intan.

Jih diyue tanyoeng, cit ubak gata

Wahe aneuknda, nyang that andalan.

Cut gangga pari, teuma neuseuot

Di cut bintang sreot, neukheun le nyoban.

Upah hai ponek, tan ulon seubot

Padum nyang batot, ubak cut intan.

Sebab nyan putroe, raja that ade

Cit bandum sare, patot geupadan.

Miseu nyoe dum buet, hana geutukri

Nyan cit mustahi, nanggroe geugenggam.

Nyan meunan narit, cut pari gangga

Ponek neu gisa, neuwoe u dalam.

Neubeuot jaroe, ateuh jeumala

Di putroe muda, neutanyong rijang.

Padum hai ponek, nyan upah ija

Neupeugah sigra, haba neuh beutrang.

Teuma di ponek, neujaweub pantah

Laju neupeugah, haba buleun trang.

Ban ban nyang neuyue, cit ka geupeugah

Hana nyang salah, meuleubeh pih tan.

Oh ban neudeungoe, ka meunan haba.

Cut rakna cinta, ajaeb han ban.

Keubit that bijak, bit pari gangga

Ka deungon haba, sangat meulambang.

Neujaweub putroe, kameunoe neukheun

Hai ponek buleun, nyang that andalab.

Hana lon tu oh, padan ngon patot

Meu ureung peugoet, tan ulon pandang.

Bit pih ka meunan, wahe ponek droe

Na cit disinoe, dumban lakuan.

Teulheuh nibak nyan, cut rakna cinta

Neujok rupia, lhee reutoh uang.

Nyompat hai ponek, keu upah ija

Neupeuwoe lanja, keudeh ju rijang.

Sirtoh limong ploh, keu upah ija

Nyan cucoe gata, nyang po bagian.

Sirtoh limong ploh, nyan hak keugata

Hai ponek tuha, neubalek pulang.

Teuma neusuot, cut mulu sari

Butoi that doli, haba neupulang.

Ka patot meunan, hai poe meukuta

Kanibak nama, ta undang undang.

Meukon takalon, kanibak rupa

Cit patot teuma, yang meunan ragam.

Diponek siti, neucok le pantah

Neusujud sembah, ka neusertakan.

Di dalam hate, galak meulumpah

Bit deungon mudah, meutumee uang.

Cut mulu sari, lom neumeututo

Wahe ponek e, nyang that andalan.

Bit cucoe gata, rancak sileumpah

Nyompat masalah, ci tayue kheun ban.

Kadang bak kadang, sit jeut neupeuglah

Seubab ngon langkah, jioh that jalan.

Ponek neujaweub, le pantah pantah

Cit hana salah, jih wahe intan.

Hana tom dijak, sit meung silangkah

Peujeut keuh salah, nyoe jih kadatang.

Di putroe rakna, yoh nyan ka teukhem

Cut puteh licen, cahaya intan.

Bit bit nyoe ponek, nuoe sang lagee jen

Takheun nyang laen, meunoe ka geupham.

Teulheuh nibak nyan, ponek ka neuwoe

Di tuan putroe,ka meunoe kalam.

Keubit jroh that nan, cut pari gangga

Bit maneh rasa, nibak lakuan.

Cut mulu sari, meunyang that raghoe

Neukheun le meunoe, nibak cut intan.

Nibak laku nan, hai poe meukuta

Sang aneuk raja, nyang bit mumakam.

Meunan bit nyum sang, bak pike hamba

Dalam keunira, ka patek undang.

Bit pih ka meunan, wahe sri pada

Lon na bicara, nyoe saboh padan.

Bahle keuh tapriek, bacut nyoe ija

Nibak nek tuha, laju tapulang.

Tayue peuget lom, mise yang ka ka

Bah tacicuba, takalon macam.

Teuduek keuh oeh noe, keu putroe rakna

Ponek neu gisa, jak woe u makam.

Katroh bak rinyeun, ponek ka neuwoe

Cut poe samlakoe, neumeuhoi rijang.

Ho ka digata, hai bungong geutoe

Ulon nyoe kawoe, wahe cut intan.

Deungon meutuwah, hai po jroh rupa

Leo that that laba, ulon dapatkan.

Bak tuan putroe, meunyang karonya

Lhee rtoh rupia, puteh hana ban.

Troh lhee reutoh, sigoe ka geubri

Di ponek siti, get that sukaan.

Ngon teukhem teukhem, leumah ngon gusi

Di ponek siti, gigoe neuh rumpang.

Meunyang na bacut, hai putik rambot

Ulon teumakot, nyoe saboh jalan.

Jikheun na salah, le po bintang srot

Cut mulu seubot, ka meunan macam.

Jikheun ka salah, nyoe siploh bagoe

Ka deungon putroe, di sinan sajan.

Meunyan keuh cuco, meusok ulon moe

Hate ulon nyoe, get that susahan.

Cut gangga pari, jaweub le pantah

Nyan kadang salah, bak pendengaran.

Bak agak ulon, hana masalah

Meunan keuh nyang sah, bak ulon peupham.

Beh peu nan ponek, ka geuyue tanyoeng

Ulon pih bingong, nyoe hana troh fham.

Tamise bante, treon dari gunong

Pane na keunong, ulon meukalam.

Meubek treuk ulon, nyang saboh bala

Dum raja raja, ka gadoh agam.

Bandum beurahman, dengan pendeta

Cit hana daya, oh dipeugah ban.

Lam teungoh teungoh, neupeugah haba

Troh le teuka, sidroe dendayang.

Ka jidong diyub, di meuhoi lanja

Di ponek tuha, neujak u dalam.

Surohan putroe, nyang maharaja

Dak jeut beusigra, ka jiyue datang.

Oh ban nek deungoe, kameunan haba

Krot le ngon muka, sang sang boh asam.

Saleh putra lom, nyoe teuka bala

Dipo nek tuha, neutreon le reujang.

Laju geutamong, keudeh lam kuta

Jak sama sama, dengan dendayang.

Ponek pih katroh, nibak meuligoe

Neusembah putroe, nyang that andalan.

Deungon cut mulu, ka bandua droe

Meunyang that raghoe, bit hana macam.

Tron sabda putroe, meunyang jroh rupa

Hai ponek tuha, pakon nyoe meunan.

Pakon ka beukah, ulon eu ija

Bukon ban nyangka, oh tee neupulang.

Kajok keuh laju, cut mulu cuda.

Nibak nek tuha, kayue peuriwang.

Yue peugot balek, bak cucoe gata

Mise nyang ka ka, oh tee tapulang.

Meubek na meuri, meucob teutampai

Beulagee asai, meubek na kurang.

Bit cuco gata, nyoe le that akai

Cit jitupue hai, bandum sibarang.

Ija nyoe that treb, ka ulon keubah

Bak poma lon sah, dilee yue simpan.

Teuma keuh jinoe, nyoe ka gata plah

Sayang bit leupah, nyoe hana macam.

Beh jak leh tawoe, ju tayue peugot

Beuban laku seot, oh tee tapulang.

Meunyoe bit hana, neuingat keudroe

Gata ku hempoe, gigoe ku reupang.

Gata ulon poh, sigra bandua

Cut pari gangga, kuboh keu teupang.

Meunyoe bit kahan, nyan ek di daya

Bit kupoh gata, nyawong keuh hilang.

Di ponek siti, teuma neuseuot

Deungon teumakot, leungo ngon badan.

Ngon jaroe dua leugat le geubot

Yo deungon atot, hate pih goyang.

Peuampon pocut, meunyang meutahta

Baroekon hana, yang meunoe macam.

Pakri jinoe jeut, ija ka beukah

Keubuet nyoe nyum sah, ka meuambelan.

Nyoe hana patot, hai po meukuta

Ulon mee ija, dalam seunatang.

Oh tee troh keunoe, laju neubuka

Cit neupareksa, leugat deungon trang.

Hana meusapat, pih na yang cupa

Get that that rata, oh neumeukalam.

Teuma keuh jinoe, meunyang ka teuka

Hana troh kira, watee patek pham.

Cut mulu sari, teuma neuseuot

Ngon tuto meudhot, dan meugeureuntam.

Pakon di gata, tuto ka mulot

Nyang hana patot, bek tameukalam.

Cok nyompat ija, ci cuba peuhah

Kaeu pue beukah, atawa cit han.

Sit hana guna, ka peukreuh babah

Kacok ju pantah, kajak peuriwang.

Bak teungoh teungoh, nyoe beukah lhee pat

Oh ponek lihat, muka neuh masam.

Di dalam hate, susah neuh that that

Jinoe ka meuhat, nyawong sang hilang.

Ponek ka neumoe, meugadee gadee

Di ol bak ulee, taeu geureubang.

Wahe e untong, pakri nyoe lagee

Sang sigoe ban lhee, nyawong bit simpan.

Cut mulu sari, neujaweub meunoe

Keupeu tajak moe, wahe nek suwang.

Nyompat cok ija, neubeudoh jak woe

Neujak peujaroe, beubagah reujang.

Laju neubeudoeh, di ponek siti

Neumoe meu i i, sira neuriwang.

Oh troh u rumoh, ban neukeumbali

Di bintang pari, neutanyong rijang.

Pakon hai ponek, teuma jeut neumoe

Peutra lom jinoe, nyan bala datang.

Peugah hai ponek, keuh ubak kamoe

Bak buet nyang meunoe, bit hana reumbang.

Ponek neuseuot, wahe cut bungong

Bekle tatanyong, he meuh keunarang.

Cit paleh that that, nyan raja inong

Jitem peubangon, meureutoh macam.

Meuploh ploh macam, jitem peulagee

Keuroet jitipee, hai bungong mancang.

Meunyang get jinoe, cit taboh intee

Meubek keuh jithee, le inong suwang.

Meukon lagee nyan, hai bungong kumbee

Singoh teuh padee, nyawong bit hilang.

Cut gangga pari, neutanyong laju

Hai ponek teungku, peutra mulaa.

Cuba neupeugah, lee meusigeutue

Peutra na nabsu, cut putroe intan.

Diponek siti, seuot le pantah

Nyoe ija beukah, ka jijok pulang.

Baroe phon hana, wahe meuh mirah

Nyoe sang ka jiplah, le raja suwang.

Kajiyue peugot, nyoe ubak gata

Wahe mutia, intan keunarang.

Beukeuh lagee sot, wahe aneuk nda

Meubek meuriba, oh tee tapandang.

Meubek na teucob, deungon teunampai

Beulagee asai, beukeuh meuriwang.

Miseu kon meunan, bit jipoh hamba

Ka deungon gata, sigoe direupang.

Teuma neujaweub, cut pari gangga

Ka meunoe haba, le neumeukalam.

Meungnyan hai ponek, peucit yang aa uu

Ulon peulaku, hai ponek badan.

Ban ban nyang hajat, cut rakna itu

Neubri Tuhanku, nyoe keumudahan.

Ponek neusingab, hana kiyam le

Ka mangat hate, neudeungoe meunan.

Teulheuh nibak nyan, cut bungong pade

Neuduek laju le, hana le kalam.

Aneuk pineung ruek, han pah keuranueb

Yang ubeut ubeut, klat deungon reuhang.

Allah hai polon, ilahon makbut

Pakri nyoe bak buet, treb hana reujang.

Neubeut hikayat, kon bacut bacut

Sampoe bab keu peut, ban troh tujuan.

Akan teutapi, ulon ci jeu eut

Lon peujeut peujeut, laju ngat reujang

Seubab nyoe ulee, pih rasa hanpah

Ka meudu darah, bak ulon tuban.

Saweub fikiran, sabe lam gundah

Riyeuk nyang teuplah, pajan lon teurjang.

Aleh pajan lom, laot lon langue

Tajak meuhadu, naseb ngon badan

U pulo pineng, keudeh ta lalu

U juho abu, ngon buket bintang

Bak KLCC, keunan tawet wet

Na puteh kulet, na cit yang hitam.

Na wajah ayu, pinggul meugindet

Na ban ek ciret, cit taeu ruman.

Na yang bloe bajee, beumerek leebah.

Siluweu ayah, nyan pih beusaban.

Nyang bloe rapatu, beuwarna mirah

Cunto lon peugah, lagee nyak ilham.

Taek geuritan, bak bank neugara

Meutaek guda, neugara taman.

Meunan keuh cunto, nanggroe malaya

Hudep meurana, sit bagah seunang.

Walau hana pre, ditiyeub le ben

Meunyan hai polem, ka bu neumakan.

Adak di cok peng, hanphon uleh ben.

Ta anggap kareng, lam awih barang.

Meukrue seumangat, jeh aneuk ciriek

Ka deungon suwiek, reupah makanan.

Meukrue seumangat, chik deungon putik

Salah lon puliek, ka nyoe lam karang.

Ulon neuk peugah, keu gangga pari

Pakon roh rawi, han meuoh tuban.

Beh ka lon balek, keudeh lom lagi

Cut gangga pari, sakti neuandam.

Neudumbek sakti, laju le sigra

Neubaca mintra, leugat le reujang

Neumat ngon ija, ngon jaroe dua

Sambe neu upa, bak bunoe lapang

Cut gangga pari, cit jithee sakti

Ureung that ahli, aneuk sulotan.

Aneuk bak tungku, di kasmujadi

Meunyang mat neugri, raja saliman

Neupet ngon mata, jaroe meuasap

Hana jan siat, siap le reujang.

Ban lagee bunoe, kajeut le leugat

Nyan dum keuramat, cut muda seudang.

Nibak yang beukah, hana teunampai

Gadeoh lam gasai, meuwoe jih saban.

Buet ilmee sakti, beh peu taseubut

Hana meubacut, pih nyang meubayang.

Oh tee takalon, cit hana meupat

Cit gadoh takat, oh tee tapandang.

Hana le beukah, miseu nyang ka

Di po jroh rupa, neulipat reujang.

Neuhoi le ponek, keunan keuh laju

Nyoe hai nek teungku, neujak jok pulang.

Nibak cut putroe, rakna hayati

Teuma lom pakri, hana tatuban.

Neutanyong hai nek, bak putroe muda

Neuyue bareksa, pat beukah nyang trang.

Neutanyong hai nek, deungon neusasat

Toh siri teumpat, beukah nyang lapang.

Ulon meung peugot, hana lon tupat

Neujak leh leugat, jinoe ju reujang.

Neuseuot ponek, le pantah pantah

Nyoe beh pat beukah, hai po cut intan.

Cit jeut takalon, bah ulon peuhah

Supaya ngat sah, wahe buleun trang.

Bek le neubuka, hai nek di sinoe

Bah nibak putroe, meunyan di dalam.

Meubek teumakot, hai nek teungku droe

Jak leh tapuwoe, keudeh ju rijang.

Di ponek siti, neubeudoh leugat

Cit hana mangat, hate di dalam.

Seubab di ija, hana neulihat

Cit kureung harap, nyan ponek badan.

Bit pih lagee nyan, neujak sit laju

Hana neu eu eu, wie uneun jalan.

Meusambong : Hikayat Gangga Pari (part 5)

Oleh : Khairul Muna