BEK MEUKAREUNA SEUBAB MEUNIKAH

Meukrue seumangat, pucok bak lipah.

Sikhan ka patah, reubah dalam krueng.

Meukrue seumangat, saleum roet madah.

Jaroe dua blah, sigoe ulon leung.

Meubek takawe, eungkot khansiblah.

Adak tapeutah, hancit jitaleum.

Bek neumeukawen, ngon neumeunikah.

Meunyoe dum ayah, neucok nyoe bandum.

Beh pakon keubek, deungoe Lon peugah.

Meubit hana pah, neutrom ulon theun.

Meukeubit butoi, neucep beujeulah.

Bek rasa teulah, timoh lam rukueng.

Tajak meu angkoi, nibak lhok birah.

Yang meu'en galah, ka meusunyok rueng.

Phon that meunyang bek, deumi MARUWAH.

oh akhe PUNAH, cit karoh neuplueng.

Keudua nyang bek, KAYA BOYINAH.

Neutem meunikah, laju ka neukheun.

Singoh oh GASIEN, cit ka neuminah.

Laen neujak shah, putroe lam ajuen.

Keulhee hai adek, neuingat beupah.

Bek neumeunikah, SYAHWAT keuneuk uem.

Singoh ban kalheuh, bandum ka puwah.

Cit roh NEUKEUBAH, cut putroe meugleung.

Cit roh neudua, laen neurupah.

Yang phon hana pah, dudoe roh neukheun.

Han meubahgia, nyoe meunan ulah.

Dak pih lapan blah, inong ka neutueng.

Peut bek keurana, CANDEN poe birah.

Teu uet ie babah, neukaleon ureung.

Neupandang tari, putri sairah.

Laju keu zaujah, hate meugeudhum.

Nyoe keurna TARI, ban bintang peut blah.

Ban gadeoh CEURAH, kahan le neutueng.

Meubek cit neucok, nyan jeut meunikah.

Akhe cit teulah, janggot nibak keung.

Limong keu PANGKAT, bek roh neujak cah.

Oh gadeoh mirah, kaneutiek lam krueng.

Ban jitreon pangkat, uyup ji langkah.

Pasti neukeubah, jih hanle neutueng.

Sadeub busoe bi, tajam meulumpah.

Sigoe ta tarah, putoh saboh beung.

Lon pada limong, manteong lon peugah.

Laen ngat mudah, beh ci neupeunyuem.

Teuma meunyang jeut, get neumeunikah.

BEUKEURNA ALLAH, neuniet ban mandum.

Pasti seutia, hudep si arah.

Hantom neuminah, laen neuruguem.

Beukeurna IMAN, yang asoe siblah.

Yang jitem seumah, ALLAH yang agung.

Niscaya hudep, han meumasalah.

Na soe peulupah, bahya meurangkeum.

Kaya ngon cantek, cit na peuneugah.

Buet RASULULLAH, lam hadist neukheun.

Meunyan peureulee, neupileh zaujah.

Nak mangat mudah, oh akhe lapeung.

Tapi nyan kon phon, hai mi ngon ayah.

Bukon sunurah, peurlee ban mandum.

Meuhana IMAN, peu TARI leupah.

Meunakeun jeulah, ulat lam ruweung.

Meutapeh ie jok, pacok gleong beupah.

Ngat bek meuruwah, bak ujong cabeung.

Sang kaseb lon rok, oh noe risalah.

Bek panyang leupah, hanget oh gob kheun.

Oleh : Khairul Muna