PEURAYEOK UROE LAHE NABI

Meukrue seumangat, ampon jeunulang.

Blahnoe ngon seubrang, pakri ban pike ?

Pakri tatunyoek, hanjeut tareugam.

Jioh hana ban, hanjeut ta hade.

Hanjeut ta simak, taduek tapandang.

Tapajoh timphan, nyoe saboh cupe.

Bah keuh lon tawok, reot noe lon peusan.

Buka piasan, tuleh reot ca'e.

Pakri tatu-oh, keu kemudian.

Kadang cit badan, bagah neupeucre.

Goh seumpat lon eu, muka di taulan.

Ka ulon riwang, u yaumil akhe.

Maka seubab nyan, aduen lon tuwan.

Hai bungong rihan, siat neuhade.

Adek yang cantek, cut bungong peukan.

Keunoe e intan, siat ta che che.

Sira taduek duek, tajak peh canang.

Ngon ulon tuan, jak ta meurawe.

Tuleh peu nyang roh, kirem peu nyang trang.

Asai bek ceukang, di dalam hate.

Meunggot tatuleh, cit got gob simpan.

Dak jampang jampang, hana soe sinde.

Dak ureung teu-eoh, cit got balasan.

Tingat tulisan, hantom brok fi-e.

Peulom keuh jinoe, adoe sulotan.

Buleun rahmatan, Nabi teuh lahe.

Keu buleun maulod, ateuh janjongan.

Beutatu-oh fham, baten ngon lahe.

Meungsoe peurayeok, buleun nyoe abang.

Syuruga lapan, meuteumee wase.

Meunan neujanji, ka uleh Tuhan.

Akan ureung nyan, soe soe nyang pike.

Miseu na neujak, u simpang mamplam.

Kon meutumee blang, ureung meupade.

Miseu na neujok, meusaboh hidang.

Pasti balasan, pih han meulinde.

Dak tan si talam, na meusirantang.

Dak han tamakan, tajak meudike.

Nyang peunteng naroh, tanyoe lam kawan.

Han rugoe islam, oh tee tamate.

Oleh : Khairul Muna

Read More

BEK ROH NYANG ZALEM

Assalamu'alaikum wr wb

Karu geumuloh, wab geutheun jareng.

Ji plueng seureudeng, bak geulhom pukat.

Karu di ureung, jameun nyoe laen.

Wap pruet ka sumpeng, peuglah meularat.

Peuglah nibak buet, talo meusayeng.

Hana pat le rhem, timu ngon barat.

Ladom takaleon, ramee peudampeng.

Kon on cap siben, le peng yang jimat.

Maka that mangat, bak ji meujandreng.

Dak ji keureuleng, bagah that mupat.

Han peu di jak shah, bak nyang di sampeng.

Cit ka meupeu breng, tinggai peusiap.

Teuma nyang paloe, tanyoe hai polem.

Hana meuhoe ceng, beurangpat teumpat.

Adak tapeutoe, cit hanle lazem.

Hana soe le tem, meunyang peutupat.

Keurna geutanyoe, ka jiniet mie breng.

Bukon peureuleng, nyang peo siat at.

Jiniet geutanyoe, asoe lam sandeng.

Cit hanle mungken, jiniet malakat.

Ji kaleon tanyoe, bagoe beureuheng.

Adat pih takhem, jikaleon hanpat.

Walau pun tabri, nyan sineuk eh krem.

Adak mie gureng, pih han ji ingat.

Ateuh puncak gle, si rimueng kureng.

Teudue meunjadreng, cit sinan teumpat.

Ateuh bumoe nyoe, meutan nyang malem.

Keubit lagee jen, akai dum ummat.

Meutan soe tunyoek, arah takhem khem.

Cit roh buet zalem, hana pre saat.

Meutan soe peugah, teoh nyang seunareng.

Jadeh bit sembren, bandum tan adab.

Allah hu Allah, hate lon nguren.

Keubit that meusyen, asoe beuteupat.

Beumeuri ureung, akai nyang lazem.

Bek jeut nyang zalem, asoe nyoe jimat.

Beuneupeujioh, peureute boh jreng.

Meubek jih nyang weng, ie jih nyang cupat.

Neubri keuh sidroe, beubutoi malem.

Nyang jeut seunalen, keu bahsa kitab.

                          Oleh : Khairul Muna

Read More

HAK ATEUH LAKOE

CA'E HABA PEUINGAT

Pakri e kaom, sambinoe nanggroe.

Wahe e lakoe, peumimpin bandum.

Hudep lam dunya, bukon keu dudoe.

Kiban oh neuwoe, singoh u mideun ?

Mideun beurandeh, abeh meugilhoe.

Aduen ngon adoe, keubit tanle yuem.

Meukon keuh jinoe, sama neupakoe.

Neu uroh keudroe, naseb neuh bandum.

Gaseh lon peugah, peusan lon sampoe.

Keu ureung lakoe, rata jeut ruweung.

Hak nyang teunanggong, geuhon bit tuloe.

Han meuoh tapreo, cit duroh tuleung.

Peutama taboh, keumah phon keudroe.

Teuma sambinoe, ta uroh tiep jeum.

Yue pubuet seumbah, keu Allah sidroe.

Bek sampe tuwoe, laloe bak maguen.

Ban kana aneuk, teuduek bak sagoe.

Beuna ta pasoe, ileumee lam rueng.

Peugah ngon babah, bek tham ngon jaroe.

Bek roh meusigoe, cakcoe roh taglueng.

Meunan cit dalem, kayem ta pujoe.

Aneuk geutanyoe, sigoe goe ta uem.

Beuna ta mayang, sigoe si uroe.

Sambe tapunyoe, zike bak punyueng.

Oh rayeok sinyak, keudeh ta puwoe.

Bak balee jathoe, peuturi imum.

Mangat ji tukri, hukom lam nanggroe.

Mangat ji tusoe, Allah teoh jikheun !

Meunyang toh wajeb, peunajoh asoe.

Beh roh ji siboe, meunakeun hareum.

Bek roh jupubuet, ayeb tuboh droe.

Meungbek keuh sampoe, dijeb ie lubueng.

Meungbek roh di jak, ho laen nanggroe.

Roh ji meusahoe, jeut aneuk bajeung.

Meungbek oh meugreb, golom troh jiwoe.

Rata jeut sagoe, di jak peudiyeung.

Meungbit cit meunan, roh dijak gilhoe.

Nyan ureung lakoe, dosa meuteumeung.

Seubab tan neutham, aneuk ngon binoe.

Hudep oh uroe, macam peukateun.

Meunan e hai yah, peusan lon sampoe.

Sikrak rot rampoe, beh ci neu punyuem.

Miseu nyang butoi, neukeubah keudroe.

Meungbit miseu kon, neutumpok lam lueng.

                               Oleh : Khairul Muna

Read More

AL-FASLU S-SANI FI BAYANI T-TA'ALLUQI

HIKAYAT AKBARUL KARIM 2

( TAKLOK SIFEUT 20 - 1 )

Taklok jih ho masok jih pat

Peugah sahbat bek meutuka

Teungku deungoe ulon peugah

Masok siblah bak ISTAQHNA'

hareutoe istaghna' kaya Tuhan

Nibak alam dum barang na

Hana sapat pi tueng manfaat

Kaya meuhat nantiasa

Langet bumoe ureung seumbah

Han mube drah leubeh mulia

Adat han sidroe pi tem sujud

Hana bacut kureung mulia

Nyan keu nyang nyoe kaya mutlak

Hana neukheundak nibak hamba

Jinoe lon peugah sifeut siblah

Deungoe sahbah lon calitra

Peurtama Wujud keudua Qadim

Lheuh nibak nyan teuma Baqa'

Mukhalafah Qiyamuhu

Beu meulaku neufham makna

Sama' Basar lapan Kalam

Sikureung Sami'un sifeut mulia

Siploh sifeut nan Basiron

Mutakallimon ka seumporna

Adat hana sifeut siblah

Han sah Allah takheun kaya

Sifeut siblah kalon peugah

Masok jih sah bak Istaghna'

Sikureung sifeut ho ji tamong

Peugah bak keunong bek meugisa

Bak ISTIQAR masok sikureung

Deungoe lon bileung he syeedara

Hareutoe istiqar dum beurkehendak

Ubak zat hak Po nyang Esa

Jimeukheundak cit pi na hai

Hana sagai pi na reuda

Udep mate saket mangat

Bak hadharat nyang Kuasa

Jinoe lon peugah sifeut sikureung

Sira neubileung ulon kheun nama

Peurtama Hayat keudua 'Ilmu

Iradat tungku lhee takira

Keupeut Qudrat limong Hayyon

Keunam Muridon geuboh nama

Tujoh 'Alimon lapan Qadiron

MA'NAWIYAH geukheun nama

Sikureung sifeut Wahdaniyah

Abeh keumah lon calitra

Adat hana sikureung sifeut

Han sapeu jeut neupeureupa

Meuwoe leumoh deungon jahe

Han keu ase alam donya

Jinoe donya ka tapandang

Dum sibarang leumah nyata

Nyan keu dali kuasa Tuhan

Sifeut sikureung wajeb kana

Nyoe sikureung dilee siblah

Bak jumeulah dua ploh ka

Oh noe teuduek hoe ji TAKLOK

ho jimasok jinoe takira

Sifeut dua ploh nam nyang taklok

Tadeungoe beutrok lon calitra

Qudrat Iradat taklok bak MUMKIN

Han ho laen bak calitra

Han bak wajeb ngon mustahe

Beuthat syate tafham makna

Bak wajeb han taklok Qudrat

Kareuna meuhat wujud kana

Adat taklok Qudrat keunan

Jeut wajeb nyan jaed nama

Bak mustahe pi han taklok

Kareuna suntok jih cit hana

Adat taklok Qudrat keunan

Jih geupeunan jaed pula

Adat meunan ban neupeugah

Taklok jih sah bak Mumkina

Hareutoe Mumkin na dua ban

Meuna meutan bak takira

Miseu neupeujeut uleh Allah

Saboh gajah badan jih raya

Siribee ulee dua ribee gadeng

Hana bandeng dalam donya

Neuboh sayeup ban leulayang

Jiteureubang u antara

La ilaha illallah

Kuasa Allah barang keurija

Miseu neupeujeut saboh gunong

Hireun teuceungong taeu rupa

Tanoh jih meuh batee jih intan

Kayee jih ban pirak safa

On jih pirak nyang ladom meuh

Jioh peungeuh jiplueng cahya

Dumna cicem jiteureubang

Ladom intan ladom mutiara

Akai teuceungong hireun dahsyat

Bak buet Qudrat Allah Ta'ala

Mumkin bak Poe trang keuheundak

Ilahun haq hana dua

Oh noe habeh haba mumkin

Jinoe laen lon calitra

Sama' Basar taklok bak MAWJUD

Get nyang kusot get nyang hana

Get nyang wajeb get nyang haroh

Got nyang haloh get nyang gasa

Han bak Makdum deungon Mustahe

Nyata pike na bicara

Tiep tiep nyang na leumah takaleon

Meuseuke tan le meurupa

Miseu suara nyang bak ensan

Miseu bee beewan dum aneka

Miseu rasa bak makanan

Meukri lakuan taeu rupa

Meuhat puteh meuhat hitam

Kalon Tuhan nyang meuhingga

Sidom jijak teungoh malam

Lam batee hitam diyup donya

Leumah neukaleon uleh Tuhan

Bak lakuan meukri rupa

Nyang na Mawjud dum peudeungoe

Bu bak sigo le suara

Wujud nyang tan seukali kali

Miseu mustahe ban bit hana

Peudeungoe han takaleon tan

Bandua ban wujud hana

Sama' Basar oh noe keumah

Jinoe lon tamah laen pula

'Ilmu Kalam taklok teumpat

Tadeungoe sahbat lon calitra

Peurtama bak wajeb keudua mustahe

Keulhee ka ase jaed nama

Kalam Tuhan han mupatah

Hana harah ngon suara

Adat na harah kalam Tuhan

Ka sa ensan bak berkata

Bukon ajam bukon Arab

Han ngon i'rab han ngon bahsa

Hana dilee hana dudoe

Hana sapeu ngon tapeusa

Wa'ad wa'id amar nahi

Kalam Rabbi sikrak saja

Sinan tafham amar nahi

Dum ngon janji syurga nuraka

Oh noe habeh haba kalam

Eleumee Tuhan pakri rupa

Eleumee Tuhan han ek kheun kri

Neukeutahui dum peukara

Peulom 'arasyi deungon kursiy

Langet bumi abeh nyata

Hana bacut pih na silab

Hana sapat nyang han nyata

Nyang na neuthee nyang han neuthee

Han meusilee bak Rabbana

Aneuk batee meudum bileung

Ie laot ie krueng meuoh hingga

Dum bak kayee jeup lungkiek gle

Naleung di pante jeup jeup donya

Meuhat hingga meuoh sukat

Eleumee hadharat han ek juga

Hana padok uroe malam

Peu nyoe ensan ho ji cinta

Ho jibalek tuboh ensan

Neuthee Tuhan peukeurija

La ilaha illallah

Ate ngon lidah bek talupa

Got deungon jeuheut dalam khimat

Oh kiamat page nyata

Soe nyang taat dum geutanyoe

Page dudoe lam syuruga

Soe nyang maksiet dum geutanyoe

Page dudoe lam nuraka

Oh noe habeh makna eleumee

Tuhan neuthee dum peukara.

Meusambong....

Read More

AL-FASLU S-SANI FI BAYANI D-DALILI WA T-TA'ALLUQI - 2

HIKAYAT AKBARUL KARIM 

( DALI NA ALLAH )

Pasai nyang dua jinoe lon peugah

Dali na Allah lon peunyata

Laen nibak nyan lon boh sajan

Sifeut Tuhan taklok jih na

Lon boh su eue jaweub sajan

Jinoe lon kheun tadeungoe nyata

Teoh keu dali wahe teelan

Wujud Tuhan pi takheun na

Zat ngon sifeut hana meukri

Hantom ji eu uleh mata

Baranggasoe hantom takaleon

Pakri takheun wujud neuh na

Zat han meukri sifeut han muban

Leumah pi tan taeu rupa

Tungku deungoe ulon peugah

Wujud dali zat nyang esa

Dali wujud na zat Tuhan

Baharu alam sigom donya

Toh ri alam cuba peugah

Lon deungoe sah tapeunyata

Tiep tieo wujud laen bak Allah

Nibak nyang salah alam donya

Miseu 'arasyi dengon kursiy

Miseu bumi langet donya

Jen ngon ensan malaikat

Jeuneh lat batat asoe donya

Nyan keu alam kalon peugah

Ladom leumah ladom hana

Miseu nanggroe likot buket Qaf

Luah luah Nabi peuhaba

Pat bu tathee baharu alam

Peugah teelan lon deungoe nyata

Gata goh na jih ka jilee

Pat bu tathee baharu nyata

Miseu langet nyan ngon bumoe

Goh geutanyoe jih sit kana

Teungku deungoe ulon peugah kri

Nyang jeut dali baharu nyata

Ladom bak alam 'ARAD nyang baharu

Nyan keu tungku jeut keu tanda

'Arad tungku han lon turi

Pakri pakri saleh rupa

Hareutoe 'Arad han deong keudroe

Meukon na soe hoe jitem na

'Arad jideong cit bak jirem

Miseu teukhem manusia

Miseu puteh bak keureutah

Miseu mirah bak keusumba

Miseu rasa bak makanan

Miseu bee beewan nibak bunga

Miseu tutong nibak apui

Miseu dirui angen bawa

Miseu eleumee deong bak ensan

Miseu saktian bak anggeeta

Nyan keu 'Arad kalon peugah

Ladom leumah ladom hana

Pat bu tathee baharu 'Arad

Teoh peungeunai ci peunyata

Tungku deungoe ulon peugah

Ubah ubah rok rok masa

Meujan meuiem meujan meugrak

Dilee budak dudoe tuha

Siat sijuek siat tutong

Ladom sudong ladom naga

Meujan jiek meujan jitreon

Kaya gasien agam dara

Miseu riyeuk ngon geulumbang

Miyuep manyang taeu rupa

Jipot ribot beudoh geulumbang

Deuh tapandang deungon mata

Siat ujeun siat keumaroe

Meunan bagoe dum peukara

Udep mate dum seukalian

Na nibak nyan alam donya

Nyan keu dali baharu 'Arad

Seumpurna akai soetem kira

Nyan keu lon kheun dali na Tuhan

Baharu alam sigom donya

Sifeut dua ploh wajeb tathee

Seubab tatumee dali jih na

Toh keudali nyang jeut tathee

Pakri eleumee cuba nyata

Jinoe lon kheun wahe sahbat

Dali tatupat bak meuhingga

Siploh sifeut alam dali

Jinoe lon kheun kri tabileung sa

Sifeut wujud ngon wahdaniyah

Keulhee sabet hayat nama

Qudrah Iradah 'Alimon Hayyon

Qadiron Muridon sikureung ka

Siploh sifeut na 'Ilmu

Dali alam ban sineuna

Adat hana siploh sifeut

Alam hanjeut neupeurupa

Nyan keu sapat dali lon peugah

Jinoe lon kisah nyang keudua

Nyang nak sifeut dali kitab

Hadih ijmak kheun ulama

MURAD KITAB firman Allah

MURAD HADIH kheun ambia

MURAD IJMAK muwafakat syiah

Hana ubah bak bicara

Nyang nam sifeut cuba peugah

Takheun beusah lon deungoe nyata

Sama' Basar keulhee Mutakallim

Dum Taslim maseng tangga

Adat hana hadih firman

Sifeut nyang nam hansoe thee na

Dua nyang ka teuma jinoe lhee

Maseng sukee teumpat jih na

Peut sifeut treuk sifeut Tuhan

Dali jih nyan dua peukara

DUR TASALSUL ngon MUSTAHE

Nyan keuh dali dua peukara

Hareutoe DUR peurhentian

Meugisa ban ilang sutra

Peut sagoe jih jimeupreh preh

Peuhan jadeh lom jibungka

Peut sagoe jih tulak dengki

Jikheun peureugi dilee gata

Teuma jijak meukeukawan

Sajan sajan meugeugisa

Banpeut dilee banpeut dudoe

Pike adoe ngon bicara

Banpeut dilee jiangkee droe

Banpeut dudoe jimeudawa

Dawa jinoe han teusawur

Ban laku Dur saboh rupa

Meunan keu miseu saboh ta ato

Le ban pi le bak bicara

Hingga meuri phon bak akhe

Nyan keu mise lon calitra

Hareutoe TASALSUL peuratoran

Abeh jih han bak tahingga

Ban miseu ban riyeuk jilaot

Meuteuturot hana reuda

Riyeuk meualon seun seun sidroe

Hana padoe keunan jiteuka

Maseng maseng na soe ikot

Bineh laot dum jiteuka

Jisumpom droe seun seun saboh

Akai gadeoh bak tahingga

Buet Tasalsul hana seuneulheuh

Maken ateuh maken lanja

Tuhan geutanyoe hana baharu

Han ban laku miseu gata

Sifeut nyang phon jinoe Qadim

Lheuh nibak nyan teuma Baqa'

Mukhallafah Qiyamuhu

Peut teurtentu ka seumporna

Abeh hisab bandua ploh

Tanda lon boh pi kanyata

Miseu nyang ka ban lon peugah

Afai sahbat bek talupa

Sifeut dua ploh kalon peuri

Abeh dali pih kanyata

Meusambong keu TAKLOK SIFEUT 20

Read More

AL-FASLU L-AWWALU FI BAYANI MA'RIFATI L-LAHI TA'ALA

HIKAYAT AKBARUL KARIM - I

(MA'RIFATI L-LAHI TA'ALA)

pasai nyang phon wahe sahbat,

Ma'rifat lon peunyata.

Ma'rifat keu Tuhan ngon keu Nabi,

Na lhee bagi bak meuhingga.

Wajeb mustahe lhee ngon jaed,

Dum beuabeh neukeunai nyata.

Soe han keunai sifeut Tuhan,

Page zaman lam nuraka.

Sifeut wajeb le bak Tuhan,

Hana ensan ek jihingga.

Hana wajeb ta keutahui,

Tapeusali tapeunyata.

Seubab hana tatumee dali,

Hankeu meukri brat bak hamba.

Sifeut dua ploh wajeb tathee,

Seubab tatumee dalil jih na.

Toh dua ploh wahe tuan,

Jinoe lon kheun tabileung sa.

Sifeut nyang phon nama WUJUD,

Makna lanjut han kubawa.

Hareutoe wujud na zat Tuhan,

Sifeut jimeunan nafsi nama.

Wujud Tuhan han ek kheun kri,

Hansoe turi asai mula.

Keudua QADIM sifeut Tuhan,

Makna teelan lon calitra.

Hareutoe qadim na dilee kon,

Hana meuphon han meumasa.

Nabi dan wali hantroh ma'rifat,

Bak keunai zat Allah Ta'ala.

Akai hantroh pike han meukri,

Eleumee terhenti ke padanya.

Keulhee BAQA' sifeut Allah,

Makna lon peugah ubak gata.

Hareutoe baqa' hana ubah,

Keukai Allah rok rok masa.

Ban nyang awai meunan akhe,

Hantroh pike ngon bicara.

Bicara sisat pike singkat,

Akai dahsyat pungoe gila.

Sifeut nyang peut MUKHALAFAH,

Makna lon peugah kucalitra.

Hareutoe mukhalafah kesalahan,

Hana saban Tuhan ngon hamba.

Hana saban neumeutuboh,

Han sapeu roh mee tapeusa.

Miseu pi tan teuladan pi han,

Wujud Tuhan teu nyang Esa.

Keulimong sifeut QIYAMUHU,

Lon kheun laku hareutoe makna.

Qiyamuhu lon kheun hareutoe,

Neudong keudroe Allah Ta'ala.

Han neukheundak nyan keu teumpat,

Tuhan nyang that maha kaya.

Nyang neukheundak nyan keu pie,

Hana sabe Allah Ta'ala.

Nam WAHDANIYAH sifeut Tuhan,

Makna teelan kucalitra.

Hareutoe wahdaniyah sidroe Tuhan,

Han bilangan sa ngon dua.

Han sikutu Tuhan si bagi,

Maha suci Allah Ta'ala.

Daem kaem mee cit sidroe,

Hana sapeu nyang na seureuta.

'Arasy gohna kurusi golom

Qadim Tuhan sit ka Lama

Nyang limong nyan sifeut SALBI

Nak taturi hai syedara

Hareutoe salbi tulak lawan

Sifeut nyang tan bak Allah Ta'ala

Jinoe lon peugah sifeut MA'ANI

Soe nyang turi mubahgia

Hareutoe ma'ani nyang dong bak zat

Tadeungoe sahbat lon calitra

Tujoh sifeut nan jih HAYAT

Tadeungoe sahbat lon boh makna

Hareutoe hayat hudep Tuhan

Hana badan hana nyawa

Adat udep badan ngon nyawa

Ka seurupa ngon manusia

Hana layak neumeusifeut

Meunan wujud Tuhan nyang Esa

Lapan sifeut jimeunan 'ILMU

Tadeungoe laku lon boh makna

Hareutoe 'ilmu neutumuban

Dum seukalian abeh nyata

Neutumuban han ngon akai

Hana sagai ngon bicara

Neuteumuban cit ngon eleumee

Meunan nyang mee tapeucaya

Adat neutuban nyan ngon akai

Kakeuh zawai saboh masa

Sikureung sifeut nan IRADAT

Taklok meuhat bak mumkina

Hareutoe iradat neumeukheundak

Ban nyang layak neukaronya

Neumeukheundak han ngon nafsu

Han sikutu manusia

Neumeukheundak ngon iradat

Meunan sahbat tapeucaya

Adak neumeukheundak nyan ngon nafsu

Ka sikutu manusia

Siploh sifeut nan jih QUDRAT

Taklok meuhat miseu nyang ka

Hareutoe qudrat kuasa Tuhan

Neupeuna neupeutan siklep mata

Han ngon tuleung han ngon urat

Kuasa that that Allah Ta'ala

Adat kuasa tuleung ngon urat

Leumah leumbot akhe puasa

Siblah SAM'UN Sifeut Tuhan

Taklok jih nyan bak MAWJUDA

Hareutoe sam'un neumeudeungoe

Got nyang musu got nyang hana

Wujud nyang na dum seukalian

Deungoe Tuhan tan neubasa

Poteu Allah hana geulunyueng

Sibarang dum neudeungoe suara

Ngon deumeungoe cit ngon SAMA'

Meunan ijmak dum ulama

Dua blah BASAR sifeut Tuhan

Taklok jih nyan miseu nyang ka

Hareutoe basar neukeumaleon

Di 'ARASYI kon tahta sara

Hana bacut neumeusilee

Han ban lagee kaleon mata

Kareuna mata han bak Tuhan

Neungieng seukalian dum ngon BASAR

Lhee blah KALAM sifeut Tuhan

Taklok jih nyan miseu nyang ka

Hareutoe kalam marit Allah

Hana harah ngon suara

Adat neumarit nyan ngon lidah

Ka meuharah kalam esa

Sifeut Tuhan tilek meunan

Beugot tafham tapeucaya

Nyang tujoh nyan nak taturi

Sifeut MA'ANI hai syedara

Hareutoe ma'ani nyang dong bak zat

Miseu hayat nyang mulia

MA'NAWIYAH jinoe lon peugah

Gaseh ALLAH soe peucaya

Peut blah sifeut nan jih HAYYON

Meuato turon lon calitra

Hareutoe hayyon zat nyang hudep

Meunan sabet tapeucaya

Paki neu udep Tuhanku sidroe

Ngon udep droe seulama lama

Laen bandum seukalian

Jen ngon ensan hudep ngon nyawa

Bayang bayang wujud Tuhan

Bak barang seukalian alam donya

Hingga hudep dum geutanyoe

Geunap nanggroe seugala donya

Abeh hudep gadeoh kuat

Meuwoe hayat Allah Ta'ala

Sifeut 'ALIMUN geunap limong blah

Makna kupeugah kucalitra

Hareutoe 'alimun nyang teumuban

Dum seukalian padeok hana

Pakri neutuban Tuhanku sidroe

Ngon tuban droe seulama lama

Jen ngon ensan neubri eleumee

Kaneubri thee seugala donya

Bayang bayang eleumee Tuhan

Neubri tunuban dumna hamba

Hingga tatuban dum geutanyoe

Geunap nanggroe seugala donya

Abeh teunuban gadoh lagee

Meuwoe eleumee Allah Ta'ala

Sifeut MURIDON geunap nam blah

Meunan syiah neuboh makna

Hareutoe muridon nyang berkheundak

Peunyang layak neukaronya

Pakri neukheundak Tuhanku sidroe

Ngon kheundak droe seulama lama

Laen bandum seukalian

Neubri kheundak seugala donya

Bayang bayang kheundak Tuhan

Neubri seukalian dumna hamba

Abeh kheundak meuwoe ibarat

Meuwoe iradat Allah Ta'ala

Tujoh blah sifeut nan QADIRON

Meuato turon lon calitra

Hareutoe qadiron zat nyang kuat

Kuasa that that Allah Ta'ala

Pakri kuasa Tuhan teu sidroe

Ngon kuasa droe nantiasa

Laen bandum seukalian

Nibak Tuhan bri kuasa

Bayang bayang kuasa Tuhan

Neubri seukalian manusia

Abeh kuasa gadeoh hareukat

Muwoe QUDRAT Allah Ta'ala

Sifeut SAMI'UN geunap lapan blah

Muwafakat syiah meunan makna

Hareutoe sami'un nyang meundeungoe

Hana kloe dum suara

Pakri neudeungoe Tuhan teu sidroE

Ngon deungoe droe rok rok masa

Lawan bandum pendengaran

Karonya Tuhan dum keu hamba

Gadoh peudeungoe teuka tuloe

SAMI'UN meuwoe bak Allah Ta'ala

Sifeut BASIRON kureung sa dua ploh

Tadeungoe lon boh jinoe makna

Hareutoe basiron nyang keu maleon

Nyoe deungon kon padeok hana

Pakri neukeumaleon Tuhanku sidroe

Ngon kaleon droe seulama lama

Laen bandum seukalian

Karonya Tuhan kaleon mata

Bayang bayang keumaleon Tuhan

Neuhantarkan dum teurata

Hingga keumaleon dum geutanyoe

Geunap nanggroe seugala donya

Abeh keumaleon dum seukalian

Meuwoe basiron bak Allah Ta'ala

Dua ploh sifeut MUTAKALLIMON

Tadeungoe polem lon boh makna

Hareutoe mutakallimon Tuhan marit

That keubit tapareksa

Pakri neumarit Tuhan teu sidroe

Ngon narit droe nantiasa

Laen bandum seukalian

Karonya Tuhan harah basa

Abeh narit gadeoh ngon fham

Meuwoe kalam Allah Ta'ala

Troh ngon ajai sampoe tanggoh

Pinjaman tujoh geucok bak gata

Abeh meuwoe pinjaman tujoh

Tinggai tuboh han sakon guna

Kakeu teuduek miseu bateung

Han sigupang le hareuga

Teuka wareh asoe gampong

Geujak kunjong manyet gata

Teuma geuboh lam liang lahat

Dalam jeurat sidroe gata

Adak han amai keubaekan

Sidroe teelan lam keureunda

Supot pi that kubu pi arat

Leumah tumpat lam nuraka

Teuka adeub meubagoe bagoe

Nyum nyum tawoe u alam donya

Yoh nyan teulah tanyeusai droe

Taduek tamoe dalam keureunda

LA ILAHA ILLALLAH

kubu luah soe tem gata

Oh noe abeh saboh tambeh

Laen wareh jinoe ta kira

Sifeut nyang wajeb ka taturi

Nyang mustahe pakri rupa

Hareutie mustahe hana patot

Tuto karot han mee buka

Nyang mustahe wahe taleb

Lawan wajeb tapareksa

Miseu fana takheun Tuhan

Ngon baharu takheun nyata

Miseu meuphon takheun dudoe

Sang geutanyoe takheun rupa

Miseu neudeong ngon soe laen

Dibilangan takheun dua

Miseu klo takheun Tuhan

Han tatuban dum peukara

Miseu beunci keu makhlukat

Leumoh qudrat Allah Ta'ala

Han ghafara ngon keumaleon

Ngon klo Tuhan buta mata

Nyan keu teelan nyang mustahe

Beutapike dum teu rata

Nyang mustahe kakeuh abeh

Jinie jaed lon calitra

Hareutoe jaed nibak Tuhan

Neupeujeut alam dum barangna

Miseu neubri kaya gasien

Saket badan mangat pi na

Miseu mukmin neuboh lam jannah

Mee neupinah lam nuraka

Miseu kafe neubri lam adeup

Muwoe lom nikmat neukaronya

Meunan teelan nibak 'AQLI

Nibak SYAR'I pakri rupa

Bak syar'i wajeb meuhat

Mukmin teumpat lam syuruga

Miseu kafe page dudoe

Wajeb geupasoe lam nuraka

Jaeh bak 'aqli deungon syar'i

Miseu 'asi darohaka

Haruh neuampon ngon han teebat

Ri nyang ummat darohaka

Meunan teelan nibak 'aqli

Deungon syar'i sajan dua

Nyan keu miseu jaed bak Tuhan

Ka seumpornaan lhee peukara

Oh noe abeh saboh pangkat

Ma'rifat saboh tangga

Pasai nyang phon oh noe keumah

Singoh ta tamah pasai keu dua

Saboh neuamai jilee nyang mudah

Laen tapeusah pajan na masa

*********

Ber....

Read More