Meurumpok Ngon Putroe
Tameutheun ie jok, pacok beutagleong.
Meubek roh pareon, abeh meuligan.
Jinoe lon sambong, keu gangga pari.
Pakriban sudi, peu keujadian.
Teulheuh mufakat ligat ka neujak
Neuato tapak pakriban reusam.
Geujak han teudoh nibak astana
Cut pari gangga deungon nek agam.
Hana trep lawet lewat ka neujak
Karab sampoe hak bak putroe intan.
Troeh le u bulee di po jroh rupa
Bandum peundeta kataheo mandang.
Bak ri neukaleon kon manusia
Sang nanggroe indra sideh geutadang.
Jikaleon sifheut kadeungon rupa
Jroh han bandeng sa deungon tauladan.
Neusok pakian bit meusambot that
Adak tasurat cit jroh meurakam.
Troh le bak rinyeun cut pari gangga
Bandum pendeta neubeudoh rijang.
Kaban lapan droe neutren le lanja
Neupeumulia nyan cut andalan.
Laju kajimat teuma bak jaroe
Jikheun le dudoe meunoe ban macam.
Bit meutuah that nyoe mata kamoe
Nibak uroe nyoe gata lon pandang.
Keudeh lam balee neupeu'ek sigra
Cut pari gangga nyan pirak upam.
Kajipeuduek le ubak keurusi
Nyang that meuhimpie meuh peudoe intan.
Nibak watee nyan cut putroe muda
Neuduek bak tahta nyang keu emasan.
Di dalam tiree meurudiwangga
Teuma u luwa handeuh tapandang.
Tapi na ruweung jisinan sipat
Kanibak tingkab na bacut reunggang.
Ret nyan keuh putroe teuma neulihat
Cut pirak lipat cit deuh meubayang.
Teulheuh ban sare kaleumah rupa
Cut putroe muda sang karab pinsan.
Cit hana sapeu jitubiet haba
Ngon hate mata keunan neupandang.
Padum na lawet neupandang mata
Cut putroe muda jitubiet kalam.
Allah e poe lon cut mulu sari
Haba nyoe pasti haba kak bujang.
Bit jroh that rupa muda samlakoe
Miseu ban uroe deungon buleun trang.
Meunyan keuh saleh keu takbi lumpoe
Akan ulon nyoe laen cit katan.
Cut mulu sari neujaweub leugat
Ampon e deelat po syahi alam.
Neubri keuh bacut jeut patek lihat
Meubek treb that that tuanku pandang.
Cut putroe muda tan neupadoli
Narit cut sari neuhiroe pih tan.
Ka lalee keudroe nyan bintang pari
Oh noe keuh heunti siat nyoe kalam.
Cut mulu sari neupasoe bate
Ranub ka hase di dalam puwan.
Ubai samlakoe kajiyue bet le
Cut bungong pade neupajoh rijang.
Teuma sikeujab meunyan lheuh dudoe
Neusabda putroe po syahi alam.
Wahe e tungku guree banpeut droe
Jeut neutanyong preo jinoe le reujang.
Di dalam donya meupue nyang raya
Nibak sigala di dalam alam.
Cuba neutanyong neuci pareksa
Wahe peundeta dum seukalian.
Neukheun beurahman teuma le sigra
Wahe aneuknda meunyang andalan.
Cuba tapeugah hai bijeh mata
MEUPUE NYANG RAYA DI DALAM ALAM ?
teuma neujaweub cut pari gangga
Wahe peundeta ban seukalian.
Cit hana daya deungon upaya
Nyoe saboh hamba meunyang hinaan.
Bek la'an dumlon nyoe sidroe bala
Meunyang peundetaa dum gadeoh ajam.
Meuhan cit ek glah lon jaweub sabda
Peulom lon hamba saboh mie pirang.
Ulon troh keunoe nibak ron langkah
Keu masaalah bukon lon peutrang.
Ulon jak deungoe keu masaalah
Seubab bit meugah ajib hana ban.
Keubit pih meunan wahe pendeta
Jeut ulon cuba meusikrak kalam.
Lon harap sangat bek teumuruka
Kanibak raja po syahi alam.
Beuna ngon salah meubek neuharoh
Kadang cit hantroh dalam ingatan.
Meunan lon harap wahe tungku beh
Jaroe lon siploh cit patek julang.
Putroe neudeungoe meunan suara
Cit nadum saka di nanggroe siyam.
Sijuek that hate ka lazat mata
Keubit meurasa tinggai u dalam.
Kanibak putroe ditreon le sabda
Wahe pendeta dum seukalian.
Cit hana patot ulon muruka
Hana pue geunta syok deungan waham.
Neukheun beurahman teuma le sigra
Wahe aneuknda cahaya intan.
Meubek teumakot hai po jroh rupa
Neupeugah sigra wahe buleun trang.
Cut pari gangga teuma neuseuot
Kon ulon takot meubek tawaham.
Meupat nyang mayot disinan lupot
Pat nyang meusangkot cit sinan peujam.
Meunyoe ka meunan wahe pendeta
MEUNYANG THAT RAYA DI DALAM ALAM.
NYAN ANGAN HATE DI MANUSIA
Laen cit hana dum seukalian.
Meunan neukata le po jroh rupa
Bandum peundeta seungab le diyam.
Hanale tubiet meusikrek haba
Salah ngon beuna hana jikheun ban.
Jitreon le sabda bak tuan putroe
Wahe guree droe pakon ka diyam ?
Salah ngon beuna beuneuhareutoe
Hana get bagoe nyoe meunan macam.
Jaweub beurahman ampon e deelat
Nyan cit beuna that e syahi alam.
Habeh uln pham deungon etihat
Cit hana dapat rot taneuk buwang.
Akan teutapi wahe khalifah
Kiban nyang titah bak deelat makam.
Kanibak patek cit hana salah
Sibeuna kasah nyan ban jawaban.
Teuma neujaweub cut putroe muda
Kanibak hamba cit keubeunaran.
Meungka bit beuna ubak peundeta
Cit pane daya lom ta ubahkan.
Ulon teurimong nyoe saboh ka glah
Keu masaalah meunyang mulaan.
Cut pari gangga meunyang meutuwah
Ka neuisyarah ubek jen rijang.
Rakna hikmat neupatoh makna
Nyan tiree rawa kasreot le yoh nyan.
Kajikoh taloe cit hana meuri
Putroe hayati katahe mandang.
Kasreot silapeh nyan tiree raja
Bandum peundeta cit ajeb datang.
Beh pakon tiree kasreot jih keudroe
Bak dilee baroe hantom nyang meunan.
Adak pih takheun buet angen tampoe
Nacit troh sampoe keu kedengaran.
Teuma di putroe lom neumeusabda
Wahe pendeta nyang that andalan.
BEH PEU NYANG UBIET DI DALAM DONYA
Bandum sineuna jidalam alam.
Teuma neumarit tungku peundeta
Wahe aneuknda cut pirak upam.
Neupeugah rijang hai cahya mata
Meunyan keuh sabda raja peutuan.
Kaneujaweub pe nyan po jroh rupa
Wahe peundeta nyoe beuget neufham.
MEUNYAN KEUH ALAM CIT UBIT RAYA
Nibak ureung ka nyang troh dukaan.
Meuget hampe toe kadeungon jioh
Bandum meunyan troh cit deuh neupandang.
Beh get nyang gasa atau pih haloh
Ban mandum putoh neudeungoe pih tan.
Meunan neumariet le bungong kumbee
Bandum na guree seungab le diyam.
Neuduek teugoe goe neutumpang ulee
Seubab ka teuntee nyan keubeunaran.
Di putroe muda ka teuhah babah
Keubit that ceudah cut pirak upam.
Cit beuna that that lagee geupeugah
Hana nyang salah nyan peurkataan.
Teuma le putroe ka neumeusabda
Wahe peundeta dum seukalian.
Pakon ka seungab hana le haba
Salah ngon beuna nyan pakri macam.
Bandum peundeta dudoe neuseuot
Ateuh that patot nyan keubeunaran.
Wahe tuanku cut bintang kutob
Bit that meusambot ban nyang khabaran.
Hana le daya deungon tatulak
Cit ka sibeuna bak nyan peurkataan.
Cit jeub jeub nanggroe kahabeh lon jak
Gohlom meurumpak nyang meunoe macam.
Neujaweub putroe meunyang jroh rupa
Wahe peundeta meunyang andalan.
Meungbit ka beuna nyan nibak gata
Nibak lon teuma pi ka nyoe meunan.
Ulon teurimong wahe guree droe
Dua ka sampoe tinggai yang nam.
Rakna hikmat tiree lom jilhom
Kasreot meusumpom nibak keunarang.
Cit hireun hate cut bungong teupreom
Nyoe soe saleh rhom nyan tiree intan.
Ureung pih hana tiree pih ka srot
Bit hana patot nyang meunoe macam.
Cut mulu sari teuma neujaweub
Wahe e pocut nyang cahya intan.
Hana nyang laen wahe meukuta
Cut pari gangga nyan peurbuatan.
Cit seun silapeh srot hai mulia
Nibak pham hamba nyan bandum simpan.
Meunan neumarit cut mulu sari
Teuma putroe ti lom neumeukalam.
Ci neutanyong lom wahe guree beh
PEUTRA NYANG JIOH DI DALAM ALAM ?
cit neuyue peugah meunyan beuputoh
Meuhana ek troh nibak ulon pham.
Neujaweub teuma cut bungong mirah
Deungoe lon peugah wahe beurahman.
SEUGALA NARIT MEUNYANG KA LEUPAH
Cit sangat payah jioh hana ban.
Adak pih talet ngon tapeuguda
Wahe peundeta meutumee jih han.
Meunyan nyang jioh cit jarak raya
Laen cit hana dum meunan meucam.
Kajibeudoh le bandum peundeta
Cut pari gangga jicom le yoh nyan.
Bit sangat beuna wahe aneuknda
Cit hana daya ulon tulakkan.
Sijuek ngon mata ulon ngon hate
Wahe cut kande bit that beunaran.
Meu barangkasoe han ek ji ungki
Bit get that ahli akai neuh tajam.
Kanibak putroe jitren le sabda
Wahe peundetaa guree lon nyang trang.
Bit sangat beuna kanibak hamba
KA LHEE peukara nyoe sudah khatam.
Ulon teurimong wahe e guree
Meunyang ka glah lhee wahe beurahman.
Meunyang keupeut ulon peuteuntee
Cut bungong kumbee meunan meukalam.
Rakna hikeumat jilhom lom tiree
Cut bungong kumbee ka hireun mandang.
Bandum peundeta ka hireun laloe
Kateuhing gigoe sang plok bak beukam.
Cut putroe muda hanpeu ta tanyong
Cit ka teuceungong hireun hana ban.
Ajeb bit sangat cut putroe bungong
Beh peu neutanyong keuhase rijang.
0 comments:
Post a Comment
Note: only a member of this blog may post a comment.